كود سبور//

حاطين مانشستر يونايتد النگليزي العين على الدولي المغربي نايف أگرد لاعب ريال سوسيداد الإسباني المعار له من ويستهام النگليزي، وطامعين الشياطين فالخدمات ديالو، واخا سوسيداد باغيين يخليوه معهم.

وحسب جريدة “Fichajes” الإسبانية، فنايف أگرد ولى قطعة رئيسية فالدفاع ديال ريال سوسيداد الإسباني وأنه بين مستوى كبير فالدفاع عن فريق المدرب إيمانول ألگواسيل، وهذا الشي اللي مخلي نادي الباسك باغي يشري العقد ديالو بشكل نهائي من ويستهام.

وكشفت الجريدة، أن مستقبل نايف أگرد ممكن ياخد اتجاه مختلف، حيث مانشستر يونايتد النگليزي حاطين عليه العين وباغيين يسنيو معه فالسوق الصيفي المقبل، وناويين يتفارضو عليه مع ويستهام.

وزادت وضحت الجريدة، أن مانشستر يونايتد كايشوفو فنايف أگرد اختيار مزيان بالنسبة لهم، وغايحل مشاكل الفريق فالدفاع ومناسب لأسلوبهم، بالإضافة للتجربة اللي عندو فالنگليز والبطولات الأوروبية.