وكالات//

عرفات مسابقة ملكة جمال الكون هاد العام اللي تدارات فـ بانكوك، تايلاند، واحد الموقف مثير بزاف، من بعد ما الملكة الحالية فيكتوريا ثيلفيغ خرجات من القاعة فوسط الحفل احتجاجاً على تصرف واحد من المسؤولين فالمسابقة، اللي هو نَوات إتساراغريسيل، حيث وبّخ ملكة جمال المكسيك ميليسا فلوريس بوش قدّام الجميع حيت ما حضرتش لجلسة تصوير ديال واحد من الرعاة.

الواقعة كانت مباشرة على صفحة ملكة جمال الكون تايلاند فـ”فيسبوك”، وبان فيها نَوات اللي هو نائب رئيس منظمة ملكة جمال الكون لمنطقة آسيا وأوقيانوسيا، كيطلب من بوش توقف وتشرح الموقف ديالها. البنت بان عليها التوتر، وما قبلاتش يوبخّوها قدّام زميلاتها، وهنا نَوات قاطعها ونعّتها بـ”الغبية”، ومن بعد نادى الأمن باش يخرجوها من القاعة.

وخا هي خارجة، عدد من المتسابقات تضامنوا معاها ووقفوا حتى هما، بحال اللي باغين يخرجوا كاملين، وسمع نَوات كيغوّت “وقفو! وقفو!” قبل ما يأمرهم يرجعوا يجلسوا.

لكن فيكتوريا ثيلفيغ ما بقاتش، وخرجات وهي كتقول: هاد الشي كيتعلق بحقوق المرأة… حنا كنحترمو الجميع، ولكن ما يمكنش يتعاملو بهاد الطريقة