كود الرباط//

علمت “گود” من مصدر مطلع، أن مرشح الاتحاد الاشتراكي للقوات الشعبية لرئاسة لجنة العدل والتشريعية، يحظى بدعم من وزير العدل عبد اللطيف وهبي، عكس مرشح الحركة الشعبية سعيد سرار.

التسريبات الحالية، واللي تزامنت مع الاجتماع الحاسم للي غايديرو رشيد الطالبي العلمي، رئيس مجلس النواب، مع رؤساء الفرق، هاد العشية، رونات الاحزاب المشكلة للبرلمان، خصوصا في ظل الحملة القوية لي دايرين الاتحاديين بدعم من وهبي لمرشحهم سعيد باعزيز.

باعزيز، تلاقا رؤساء فرق، وخبرهم بلي عندو دعم قوي من وزير العدل عبد اللطيف وهبي، هادشي بالنسبة للحركة الشعبية عادي جدا، بسبب الخلافات الكبيرة بين محمد اوزين الامين العام للحركة وعبد اللطيف وهبي الامين العام السابق للبام.

قيادي فالحركة الشعبية قال ل”گود”؛ اذا كان وهبي فعلا دايرا حملة لصالح مرشح الاتحاد، فهادي سابقة من نوعه وتدخل غير دستوري في عمل البرلمان، اذ لا يعقل ان يتحكم وزير في منصب مخصص للمعارضة.

وشدد ذات القيادي بالقول :” بأي حق وبأي قانون يتدخل وزير بشكل مفضوح لدعم مرشح ضد مرشح في منصب رئيس لجنة هي موضوع مساءلة لحصيلته”.
ترويج دعم جزء من البام لباعزيز، يرجع اساسا للمشاريع المهمة للي جايا باش تناقش فاللجنة، منها مشروع القانون الجنائي ومدونة الاسرة ومدونة الشغل وقانون الاضراب وغيرها.
غاتكون هادي سابقة، يكون باعزيز مرشح مدعوم من بعض الاتحاديين  ومن وهبي فقط وماشي من البام، خصوصا ان المرشح المنافس ديالو حتى اتحادي سابقا.