كود الرباط//

بمجرد ما تنتاخب رئيس جديد لمجلس المستشارين لبارح السبت فشخص الاستقلالي محمد ولد الرشيد خلفا للنعم ميارة، هاد الانتخاب لي تم بسلاسة وبدون مشاكل تذكر بحيث كان مرشح وحيد وفاز بأغلبية ساحقة 94 صوت مقابل 10 ملغاة وغياب 15 عضو، عاود رجع مجلس المستشارين لعادته القديمة.

فمباشرة بعد جلسة انتخاب الرئيس، ناضت قربالة داخل المجلس وتقريبا فكل الفرق. والسبب؟ احتدام الصراع بين أعضاء الفرق بالغرفة الثانية حول المناصب بأجهزة وهياكل المجلس: المكتب، والفرق واللجان الدائمة، وخاصة فرق الأغلبية الحكومية.

وكان مقرر تنعاقد جلسة ثانية نهار الاثنين 14 أكتوبر لاستكمال انتخاب هاد الهياكل، لكن أغلب الفرق ما قدروش يقدمو اللوائح ديال المرشحين ديالهم باش يتم التصويت عليها دفعة واحدة، كيما هو منصوص عليه فالنظام الداخلي.

وشوهد أعضاء فريق التجمع الوطني للأحرار نهار السبت فالعشية فالساحة المقابلة لمدخل المجلس وهوما فحالة غليان كبير بعد خروجهم من اجتماع فشلوا فيه على التوافق على المرشحين لرئاسة الفريق، والعضوية فمكتب المجلس ورئاسة اللجان الدائمة.

وحسب مصدر من الفريق، فإن أغلب أعضاء الفريق ما راضيينش على عطاء الفريق فالنصف الأول من الولاية التشريعية وكيقولو: كيفاش وقع انتخاب رئيس جديد للمجلس وممثلي فريق الأحرار فأجهزة المجلس يبقاو فبلايصهم واخا حصيلتهم هزيلة للغاية وخاصة الأعضاء الثلاثة فالمكتب: محمد حنين وجواد الهلالي ومصطفى مشارك.

وحسب نفس المصدر، فإن فريق التجمع الوطني للأحرار قرر فنهاية المطاف يرفع أمر الحسم فالترشيحات لرئيس الحزب عزيز أخنوش.

نفس الشيء أيضآ ففريق حزب الاستقلال لي بدات فيه ما يشبه عملية تصفية تركة النعم ميارة، الرئيس السابق.

وحسب مصدر من حزب الاستقلال، فقد انتهى مسار فؤاد القاديري، نائب رئيس المجلس، كيما انتهى مسار محمد سالم بنمسعود لي كان محاسب فالمكتب وكان من أكبر الغائبين على المجلس فنصف الولاية السابقة.

الفريق الاستقلالي قرر يجيب وجوه جديدة مقربة من الرئيس الجديد ولد الرشيد وهاد الشي خلق صراع وخاصة بين محمد زيدوح وعبد القادر الكيحل من جهة، ولحسن حداد والطرمونية من جهة أخرى. وكاينة أصوات كتقول بلي حتى رئيس الفريق عبد السلام اللبار خاصو يقبل التداول على رئاسة الفريق ويخلي بلاصتو نقية لشي حد جديد.

ففريق الأصالة والمعاصرة، هناك أيضا صراع، لكن بحدة أقل بسبب أن هناك ما يشبه طابو ولي هو: تا واحد ما قادر يهضر على الحصيلة الهزيلة ديال أحمد اخشيشين، النائب الثاني للرئيس فنصف الولاية السابق. دابا كيفاش؟ هاد أحمد اخشيشين لي قليل فاش كيجي للمجلس وتقريبا ماكيدير والو وباغين تعاودو ترجعوه باش يدير نفس الحصيلة الهزيلة وترجعو تقولو الحكامة والفعالية وربط المسؤولية بالمحاسبة وداك الشي.. وكونو تحشمو شوية، راه مورا الخطاب ديال سيدنا ما بقا مايتخبا وخلليو وجوه جديدة تخدم وتعطي لبلادها وباركا من الريع السياسي، يقول مصدر من الفريق ما باغيش تجبد سميتو.

أيضا، ففريق الحركة الشعبية، كاين ما يشبه “حرب أهلية”، كولشي كيضرب فكولشي، وهاد الشي ماشي على المصلحة العامة. لا، هاد الشي كامل باش يقلعو شي وحدين قربو يتصداو فبلايصهم بقوة ما عمروا فيهم.

وكيما سبق وأشارت ليه “كود”، فالحرب نايضة على منصب الخليفة الرابع لرئيس المجلس لي كيحتلو المهدي عثمون المدان من قبل القضاء بالسجن سنتين، وواخا الأمين العام لحزب الحركة الشعبية محمد أوزين أكد بلي الحزب غيرشح المستشار البرلماني الصحراوي يحفضو بنمبارك، إلا أن بعض أعضاء الفريق وخاصة عبد الرحمن الإدريسي ما بغاوش ينضبطو لقرار الأمانة العامة.

وحسب مصادر “گود”، فالإدريسي كيهدد بمغادرة الحزب نهائيا فالاستحقاقات المقبلة فحالة إلى ما داز هاد المنصب بالتصويت. وزيد عليها بعض الملاحظين كيتسألو: دابا كيفاش حتى رئيس الفريق الحركي مبارك السباعي لي كل شي عارف المستوى ديالو، شنا هي الحكمة من إصرار قيادة الحزب على الاحتفاظ بيه كرئيس للفريق، حتا هو خاصو يمشي يرتاح شوية من الامتيازات.

باقي الفرق فيها أيضا صراعات، وخاصة فريق اتحاد المقاولات لي بمجرد ما تفكو من عبد الإله حفظي رجع الصراع على بلاصتو بين نايلة التازي ومحمد رضى الحميني. واخا أن نايلة امرأة إلا أن الشاب الحميني. المنصيب كيميل لهاد الاخير

فالفريق الاشتراكي، كاينة قنبلة كتزيد تشعل الحرب لي نايضا مؤخرا بين الاتحاد والأحرار، وهي أن الفريق يتحرم من رئاسة لجنة العدل والتشريع وحقوق الإنسان بعدما ترفعات التمثيلية بالنسبية بسبب ارتفاع عدد أعضاء فريق الأحرار لي التحقو بيه 3 من قدماء البيجيدي. ممكن تعطا رئاسة العدل والتشريع لفريق آخر فالمعارضة من غير الاتحاد برغبة من الأحرار.

أما داخل الاتحاد المغربي للشغل، فيبدو أن الأعضاء ديالو حتى هوما متدمرين من سيطرة ميلود معصيد ونور الدين سليك على الامتيازات فالمكتب وفالفريق، وواخا أن كل الشي كيطالب بمقاربة النوع وإعطاء منصب للمرأة وخاصة الإطار الكبير زهرة محسين.

هادي إذن حصيلة تفاصيل التحريات لي جمعاتها “كود” من الروينة لي نايضة فمجلس المستشارين ولي بسببها تأجلات جلسة الاثنين لاستكمال انتخاب أجهزة الغرفة الثانية إلى أجل غير مسمى.