كود – سبور//

خرجات تقارير إعلامية برتغالية كتهضر بلي كريستيانو رونالدو وخطيبتو جورجينا رودريغيز كيوجدو باش يديرو عرسهم هاد السيمانة فجزيرة ماديرا البرتغالية، فين تزاد رونالدو.

وحسب هاد التقارير، الكاتدرائية الرئيسية فمدينة فونشال تريزرفات باش تحتضن العراسية نهار السبت الجاي مع 3 ديال العشية، على حساب التقاليد المحلية. وزادو قالو بلي الثنائي حجز حتى فندق Savoy Palace الفاخر باش يدارخ فيه حفل الاستقبال، لدرجة أن إدارة الفندق بلغات النزلاء بلي جوج طوابق وعدد من البارات غادي يتسدّو نهار الجمعة والسبت .

اختيار ماديرا ماشي صدفة، حيث هي المدينة اللي تزاد وكبر فيها رونالدو قبل ما يبدا المشوار الكروي ديالو اللي خلاه واحد من أشهر اللاعبين فالعالم ،ودابا كيكمل المسيرة ديالو مع نادي النصر السعودي.

رونالدو وجورجينا بداو العلاقة ديالهم عام 2016، وأعلن اللاعب الخطوبة ديالهم فغشت من العام اللي فات. وخلال الأسبوع اللي فات، تزادت الشكوك بلي العرس قرب مني تشافو جوج لابسين خواتم دلماس وهما طالعين ليخت  فجزيرة مايوركا الإسبانية.

وكان رونالدو سبق ليه صرح فحوار سابق مع الإعلامي بيرس مورغان بلي كان كيحلم يدير العرس ديالو من بعد كأس العالم، وقال: “كنت كنتمنى نوصل لنهار العرس وأنا هاز كأس البطولة.” ولكن المنتخب البرتغالي خرج من نص النهائي قدام إسبانيا، اللي فالأخير ربحات اللقب.

وأكد رونالدو  أن جورجينا هي المرأة الوحيدة اللي خلاه يفكر فالاستقرار وتكوين أسرة، وهاد الشي خلا خبر العرس المحتمل ديالهم يثير اهتمام كبير وسط الجمهور ديالهم فالعالم كامل.