گود سبور//

اعتبر النجم البرازيلي السابق رونالدو نازاريو وواحد من أساطير الكورة البرازيلية، أن المغرب كايلعب كرة القدم بأسلوب واعر فـ السنوات الأخيرة، وكايشوف أن المنتخب المغربي غادي يكون خصم قوي للبرازيل فـ مونديال 2026، بعدما طيحتهم القرعة فـ الگروب الثالث من البطولة.

وقال رونالدو فـ تصريح له بمناسبة الكشف على برنامج ماتشات كأس العالم والتيرانات ديال البطولة بالعاصمة الميريكانية واشنطن: “المغرب كايلعبو الكورة بأسلوب واعر هادي شي 5 ولا 6 سنين، وشفناهم كيفاش وصلو لدومي فينال مونديال 2022 بقطر”.

وكمل الظاهرة رونالدو وقال إن المنتخب الوطني المغربي هو اللي كايشكل أكبر خطر على البرازيل فـ الگروب الثالث، اللي فيه حتى أسكتلندا وهايتي، ووضح أن هذا الگروب صعيب ولكن كايشوف بلي الأمور غاتكون بخير وعاود أكد أن الماتش ضد المغرب غايكون معقد.