كود سبور//

سالات التجربة ديال المدرب الفرنسي هيرفي رونار مع منتخب فرنسا لكرة النسوية، بزيرو لقب بعدما تقصاو اليوم السبت من أولمبياد باريس2024.

وخسر المنتخب الفرنسي للعيالات اللي كايدربهم هيرفي رونار قبل للحظات أمام المنتخب البرازيلي بنتيجة واحد لزيرو، ماركاتو البرازيلية گابي بورتيو فالدقيقة 82، وتقصاو من ربع نهائي أولمبياد باريس، مع العلم أن الفرنسيات هما اللي كانو مسيطرات على الماتش ولكن ما قدروش يستغلو الفرص اللي جاوهم من بينها بينالتي زگلاتو الفرنسية من أصول مغربية سكينة قرشاوي فالشوط الاول، وتقصاو الفرنسيات وتأهلو البرازيليات للدومي فينال وغايلعبو ضد الصبليون.

وكان هيرفي رونار قال قبل مدة أن أولمبياد باريس2024، غاتكون آخر بطولة له مع المنتخب الفرنسي للسيدات، اللي بدا كايدربهم من مارس 2023، وشارك معهم فمونديال2023 وتقصاو من ربع النهائي.