وكالات//

دارت بقرة الروينة فواحد المزاد ديال المواشي فولاية أركنساس الأمريكية، بعدما ناضت نوضة مفاجئة من حلقة العرض وطاحت وسط المدرجات، وتسببات ف سقوط سقف، وكلشي تصدم من المفاجأة. هاد الواقعة النادرة توثّقات بالكاميرات وانتشرت بزاف فمواقع التواصل.

الواقعة كانت فـ”مزاد ديكاتور” المعروف، وفجأة ناضت البقرة اللي كانت معروضة للبيع، ونقزات على المدرجات فين كاينين الناس، وطيحات معاها شوية من سقف القاعة، وكلشي بدا كايغوّت ويهضر ويحذّر من الخطر.

فواحد الفيديو اللي دار البوز، باينين الناس كايهربو من طريق البقرة الهائجة، وشي واحد كايغوّت: “خرج من تمّا!” باش ينبه الآخرين من الخطر اللي جاي.

من بعد، قدرو مجموعة من الفلاحة والناس اللي خدامين فالسوق يسيطرو على الوضع، من بعد ما جراو شوية ورا البقرة، وقدرو يخرجوها من القاعة بلا ما يكون شي إصابات فالبشر، ولكن السقف وبعض الكراسي تضرّاو.

الواقعة خلات الناس فالسوشيال ميديا يتفاعلو بزاف، بين اللي كان كايضحك وبين اللي كايطالب بأن الأمن والسلامة يتشدو أكثر فبحال هاد التظاهرات، خصوصاً أن هاد النوع من الحوادث كيتعاود ملي كتهرب شي حيوانات فالأماكن المسدودة.