كود -وكالات//

فخطوة علمية جديدة علن نائب وزير العلوم والتعليم العالي فروسيا، دينيس سيكيرينسكي، على انطلاق مشروع ديال علاج جيني كيواجه العمليات البيولوجية اللي كتسرّع الشرف، هاد المشروع كيشرف عليه “معهد بيولوجيا الشيخوخة والطب”.

العلاج الجديد ماشي غير فكرة نظرية، ولكن تجربة علمية كتحاول تبلوكي واحد الجين اللي كيلعب دور فشيخوخة الخلايا، العلماء كيراهنو بلي بلوكاج هاد الجين يقدر يعطل العيا الطبيعي ديال الجسم، ويخلّي الخلايا تبقى بصحة مزيانة لمدة طويلة، الغرض هنا ماشي غير الشكل الخارجي ولا الشباب ديال الوجه، ولكن الحفاظ على الأعضاء الحيوية بحال القلب والمفاصل، وتقليل خطر أمراض مرتبطة بكبر السن بحال السكر وأمراض القلب، والا مشات الأمور مزيان يقدر  يبدا الإنتاج ما بين 2028 و2030.

وفنفس السياق، روسيا خدامة حتى على مشاريع طبية أخرى من بينها تطوير لقاحات مخصّصة للسرطان بتقنية  mRNA، واللي ممكن تدخل فالتغطية الصحية الإجبارية ابتداءً من 2026. كاين حتى دوا جديد سميتو “Enteromix”، مازال فمرحلة التجارب، بان بلي عندو قدرة يحفّز جهاز المناعة باش يهاجم الأورام.