كود سبور//
طيح رئيس الاتحاد الإسباني لكرة القدم لويس روبياليس كواريه، وقرر يقدم الاستقالة ديالو من البوسط بعدما كبر عليه الماتش بسبب الاتهام ديالو فقضية تحرش جنسي فحق لاعبات المنتخب الإسباني لكرة القدم.
وأعلن لويس روبيالس فبلاغ تناقلاتو وسائل الإعلام الأوروبية عن الاستقالة ديالو من منصب رئيس الاتحاد الإسباني لكرة القدم، وأنه صافي ما بقاش قاد يزيد يبقى فالبوسط ديالو مازال.
ومتابع لويس روبياليس من طرف الادعاء الإسباني فقضية تحرش جنسي، بعدما باس لاعبة منتخب إسبانيا جيني هيرموسو ففمها خلال فينال كأس العالم للسيدات وبرك يعنق فاللاعبات الأخريات.
وكيجي قرار لويس روبياليس بعدما وقفو الاتحاد الدولي لكرة القدم عن المهام ديالو فالاتحاد الإسباني مؤقتا وفتح تحقيق، وحطت الحكومة الإسبانية شكاية عند المحكمة الرياضية الدولية الطاس ضدو باش يمشي بحالو.
