كود طنجة//

من بعد الصداع الكبير اللي ناض اليوم في مجلس جماعة طنجة، وخلى رئيس فريق البام امحمد احميدي يقدم استقالتو، مصادر بامية كشفت ل”گود” سياق هاد الازمة الداخلية لحزب التراكتور ف طنجة وعلاش الليموني “داير فيها” واعر وحتى حد ميقد عليه.

فحسب مصادر خاصة لـ”كود”، منير الليموري لي هو مجرد منسق إقليمي لحزب البام ولى داير المنسق الجهوي للبام عبد اللطيف الغلبزوري خاتم بين يديه، وكيحركو كيف بغا. حيث باينا للعمى من لول، لغبزوري ماشي من الاعيان وماشي من صحاب الشكارة، موظف بسيط دايرينو فالواجهة فحزب كيحكمو فيه الاعيان.

مصادر “كود” قالت بللي الغلبزوري كان هو السبب الحقيقي في استقالة الحميدي من رئاسة فريق الحزب في مجلس الجماعة، حيث الحميدي ما سترطاتش له كيفاش الغلبزوري يجي مع الليموري رغم أنه غارق في الفضائح وباغي يغرق مع الحزب.
مصادر “كود” قالت بلي هادي ماش أول مرة للي كيدافع فيها الغلبزوري على الليموري، رغم أنه عارف بأنه غادي للحيط، وأكثر من ذلك كيدافع عليه قدام القيادة الجماعية، وخصوصا قدام المنصوري اللي كثيق فيه لدرجة يوصف بأنه “عراب بنت الباشا” فطنجة، وكدوز الليموري الزبايل اللي كيدير حيث كاين اللي كيدافع عليه عندها.
ولكن دبا القضية بدات كتحماض وغادي يصعاب على المنسق الجهوي يبرر كوارث الليموري، خصوصا بعد استقالة الحميدي، اللي هي غير نموذج مصغر للغليان اللي كيعيشو الحزب بالمنطقة واللي ولى مهدد بالانفجار فأي لحظة.
وكانت مصادر “كود” قالت بأن الحميدي استقل بسبب احتجاج العمدة الليموري عليه حيث شارك ف توقيع بيان تضامني مع البرلمانية الاتحادية سلوى الدمناتي للي تعرضت لإهانة شديدة واعتداء لفظي من طرف المكلف بالتواصل لدى العمدة.

نفس المصادر تشير إلى أن الليموري وطبعا، عن طريق الغلبزوري، اعتبر توقيع الحميدي بمثابة إدانة ليه حيث بقى ديما متشبث بالمستشار الخاص ديالو الزباخ، رغم تورطه في الكثير من الفضائح وله سوابق فالاعتداء على مستشارات ومستشارين وكان سميتو تجبدت فملف التلاعب بتأشيرة شينغن لدى القنصلية الإسبانية، وسمع له قاضي التحقيق في الملف للى تشدات بسبابو مستشارة عن حزب الاستقلال ودخلت للحبس.

المصادر ديال “گود” أكدت أنه كاين غليان كبير داخل بيت التراكتور فطنجة بسبابالممارسات ديال الليموري والدعم الأعمى ديال الغلبزوري، وللي كتأكد كل نهار أنه يفتقد للرزانة والنضج السياسي ” يقول مصدر بامي في طنجة، والدليل على ذلك هو جر ثلاثة ديال الأعضاء من البام المحكمة الإدارية باغي يعزلهوم لأنهم صوتو ضد الرغبة ديالو فتمرير فضيحة سوق سيدي حساين وراه خسر الدعوى فالمرحلة الابتدائية، ايضا ناس البام كيحملو الليموري مسؤولية تورط المستشار الخاص ديالو المزدوجي فحملة السب والقذف ضد صحافيين ودابا محكوم استئافيا بعامين نص د الحبس، واليوم جات الاستقالة ديال رئيس فريق القيام فجماعة طنجة وكملات الباهية، وكولشي كيعرف القيمة والوزن ديال الحميدي فالبام، للي هو فنفس الوقت رئيس مجلس عمالة طنجة أصيلة واحد الركائز القوية ديال التراكتور فطنجة منذ 2009 دابا كولشي كيقول بللي التراكتور فطنجة غادي فالخسران والليموري غادي يشتت له الشمل.