كود -كازا //

تفتح، البارح السبت، برواق “Living 4 ART” فالدار البيضاء، المعرض الجماعي “ذبذبات داخلية 21”، بحضور عدد من الفنانين التشكيليين وناس ديال الفن والثقافة، وحسب المنظمين، هاد المعرض غادي يبقى مفتوح حتى لـ24 يناير الجاي، وكيقدّم الإبداع الفني على أساس أنه تعبير على العوالم الداخلية ديال 21 فنان مشارك، بحيث الأعمال ديالهم كتعكس المشاعر، الذاكرة، والإحساسات ديال كل واحد فيهم.

وكتبان هاد “الذبذبات” اللي ما كتشوفش بالعين فطريقة استعمال المادة، واللون، والحركة، والتكوين، بحيث كل عمل فني عندو خصوصيتو ولكن داخل رؤية جماعية منسجمة، كتبرز التنوع الكبير فالأساليب والتقنيات وكتخلق حوار بصري كيدعو المتلقي للتأمل والتفاعل والتفسير ديالو الشخصي.

وفتصريح لوكالة المغرب العربي للأنباء، قالت الفنانة التشكيلية بشرى زروق باللي مشاركتها فهاد المعرض كتجي بسلسلة تجريدية جديدة سميتها “انسجام”، فيها ثماني لوحات نابعة من تأمل داخلي عميق، كتحاول من خلالها تكتشف التوازن بين الحركة والسكون، وبين نبض اللون والإحساس الروحي، معبرة على الأمل ديالها باش تعطي هاد الأعمال للزوار لحظات هدوء وتأمل.

ومن جهتها، أكدت الفنانة فاطمة الزهراء حدودي باللي فن الرسم بالنسبة ليها ملجأ جميل كيبعدها على ضغط الحياة اليومية وتعقيداتها، وكيخلي الروح ديالها تتحرر. وزادت وقالت باللي الفرشاة والألوان ماشي غير هواية، ولكن وسيلة باش تبحث على ذاتها وتشحن الطاقة الإبداعية ديالها وتدخل لعوالم فنية راقية وملهمة.