الرئيسية > تبركيك > رمضان وكونفينمون (الحلقة 6).. الممثل عبد الصمد الغرفي فحوار مع “كود”: التراويح غير سنة ومافيها باس نبقاو فديورنا.. وكنطالبو الحكومة بفتح المسارح
20/04/2021 22:00 تبركيك

رمضان وكونفينمون (الحلقة 6).. الممثل عبد الصمد الغرفي فحوار مع “كود”: التراويح غير سنة ومافيها باس نبقاو فديورنا.. وكنطالبو الحكومة بفتح المسارح

رمضان وكونفينمون (الحلقة 6).. الممثل عبد الصمد الغرفي فحوار مع “كود”: التراويح غير سنة ومافيها باس نبقاو فديورنا.. وكنطالبو الحكومة بفتح المسارح

عفراء علوي محمدي- كود//

“كود” سولات مشاهير وسياسيين وفنانين ومؤثرين وإعلاميين، على كيفاش كيدوزو نهارهم فهذ الرمضان الاستثنائي مع كورونا، وعلى رأيهم فقرارت خداتها الحكومة.

وفهذ الصدد، حاورات “كود” الممثل عبد الصمد الغرفي، اللي طالب بفتح المسارح اللي بقات مسدودة، فالوقت اللي المارشيات فيهم الزحام والفوضى…

كيفاش كتدوز رمضان دابا اللي مسدود علينا؟

فالنهار كنعس، وفاش كنفيق كتقدى لمالين الدار من السويقة، كنقابل الكيور ديالي وكنخرج الكلبة تدور شوية، ومن مور الفطور  كيعجبني نريح حدا باب الدار، وكانبقى غير تماك باش مانوقع فمشكل مع شي بوليسي.

واش الإجراء اللي اتخداتو الحكومة مزيان؟

بصراحة ماعنديش معطيات وماكنفهمش الداعي من هذ القرارات، حيت مازال كنشوفو المارشيات مكتظة والزحام، مانقدش نقول شي حاجة، هوما يعرفو.

شنو رأيك فمنع التراويح؟

التراويح سنة ماشي فرض، والتجمع فالمساجد والقهاوي غادي يزيد يدير خطر كبير كثر، ولذلك مافيها باس إلى بقينا فديورنا.

عاود لينا على دورك ف”حديدان وبنت الحراز”:

هذي تجربة جديدة مختلفة على باقي الأجزاء الأخرى ديال حديدان، من حيث تعدد الشخصيات والديكور والأدوار، وبالنسبة لشخصية “المخنتر” اللي كنجسدها فمابقاش داك الطفل اللي كيسرق البيض ويدير الشغب، المخنتر دابا كبر وصبح اليد اليمنى لحديدان، وولا يسافر معاه ويحل معاه المشاكل، وهنا كاين الاختلاف مع الشخصية القديمة، كذلك كاين اختلاف فالملابس والكوافير، والتصوير مشا فظروف مزيانة واخا الوباء، وشركة “وردة فيزيون” كانت حريصة على احترام الاجراءات الاحترازية.

كيفاش جاوك مسلسلات رمضان الخرى؟

الانتاج تحسن بزاف بالمقارنة مع الأعوام اللي دازو، كاين مسلسلات درامية فالمستوى هذ العام فالقنوات المغربية، وانا حريص باش نتفرج فكلشي.

واش كتوجد لأعمال جديدة؟

خدامين على مسرحية “سبعة رجال”، ودرنا جولات ولعبنا بدون جمهور بسباب كورونا، بصراحة تجربة خايبة بزاف لأن الجمهور هو كلشي، التلفزة على الاقل كتكون عارف غيشوفك شي حد، لكن مسرحية مسجلة وتسجيلها كنسيفطوه لوزارة الثقافة حاجة صعيبة، كنتمناو هذ الوباء يمشي باش نديرو جولتنا فالمغرب وخارجو، وحنا كنطالبو بإعادة فتح المسارح حيت ضرورية، فالوقت اللي كنشوفو الاسواق عامرين والزحامات، والمسرح ممكن يكون فيه شروط وقائية.

 

موضوعات أخرى

14/05/2021 19:00

فأكبر بؤرة وبائية ف المغرب. ضريبة الاستهتار فزمان الجايحة بدا كايخلصها حتى الحيوان.. كمامة مستعملة مرمية فالجردة وحلات فعنق ديال حمامة – تصاور

14/05/2021 18:00

فالوقت اللي زعيمها مخبي من العدالة و دخلوه لإسبانيا بوثائق مزورة.. البوليساريو هاجمات عاوتاني مجلس الأمن وكاتحاول تلعب بورقة حقوق الإنسان