كود ـ وكالات//

بوليس مصر شد واحد الشاب سميتو “أحمد السمالوسي”، من بعد ما بان ففيديو وسط المتحف المصري الكبير كيقرا آيات من القرآن قدّام تماثيل ديال الفراعنة، وهاد الواقعة دارت ضجة كبيرة فمواقع التواصل الاجتماعي.

القصة بدات منين تشهر فالفيسبوك وف تيك توك فيديو كيبان فيه الولد لي اسمو “السمالوسي” واقف قدّام مجموعة ديال التماثيل المصرية وكيقرا قدامها آيات قرآنية وكيهضر على الكفر والشرك ديال الفراعنة، والناس اللي كانو فالمتحف من الزوار والعاملين تصدمو من اللي شافوه كيدير هاد الشي وسط القاعة.

من بعد انتشار الفيديو، دخلات السلطات الأمنية على الخط وبدات تحقق فالموضوع، خصوصاً بعدما وصل المقطع لملايين المشاهدات وخلق صداع بين اللي شافو أن الشاب عبّر على رأيو بحرّية، وبين اللي اعتابرو أن المتحف ماشي بلاصة لهاذ التصرف. بزاف ديال الناس فمواقع التواصل دارو نقاش كبير حول واش “السمالوسي” خاصو يتحاسب ولا لا.

بعض المصادر قالت إن الشاب كان باغي يوجّه رسالة دينية على طريقته، ولكن الطريقة اللي دارها خلّات بزاف ديال الناس يشوفوها “استفزازية” فمكان أثري وتاريخي كيمثل حضارة قديمة. من جهتهم، المسؤولين على المتحف أكدو أنهم غادي يشددّو المراقبة أكثر باش ما يتعاودش بحال هاد النوع ديال الوقائع.