كود سبور//

أكد عادل رمزي مدرب الوداد الرياضي أن الظروف ديال الفريق فجنوب إفريقيا مزيانة، وأن رئيس النادي سعيد الناصيري موفر لهم كلشي وكيفتاخرو به، وبلي باغيين يهديو لقب السوبر ليك الإفريقي للملك محمد السادس وجميع المغاربة.

وقال عادل رمزي فتصريح لقناة الرياضية فأول يوم للوداد الرياضي فجنوب إفريقيا اللي غيلعبو فيها الاحد الجاي فينال السوبر ليك الأفريقي ضد ما ميلودي صن داونز: “الظروف مزيانة كاينين سوايع طويلة ديال السفر ولكن كلشي مزيان، جينا فطيارة خاصة وهذا الشي من الحوايج اللي كنفتاخرو بهم حينت الرئيس ديالنا كيقدم لنا كلشي”.

وكمل عادل رمزي: “كلشي مزيان وجينا يوم زايد موالفين كنجيو يومين قبل هذه المرة جينا 3 أيام قبل باش نتأضابطاو، واليوم غنبداو نولفو وغيبقاو لنا يومين باش نوجدو للمباراة، الجميع واعي بالمسؤولية وكلشي عارف شنو كيتسنانا وكنعرفو ان المغاربة ورانا، وغنديرو اللي فجهدنا باش نفرحو المغاربة وبغينا نهديو هذا اللقب لسيدنا ولجميع المغاربة”.