كود سبور//

أكد عادل رمزي مدرب الوداد الرياضي أن السوبر ليك الإفريقي كان عندو تأثير على تراجع مستوى الفريق، وأن الأخير بدا كيرجع للنيفو ديالو، وعبر على الفرحة ديالو بالفوز على اتحاد التواركة بهدف واحد لزيرو ضمن الدورة 8 من البطولة.

وتحدث عادل رمزي بعد ماتش الوداد والتواركة البارح، وقال: “فرحان على قبل 3 بوان حيث مهمة.. يمكن الشوط الأول كان احسن شوط درناه فهاد السنة والمهم من احسن الأشواط اللي شفتهم فطريقة اللعب والتنظيم ومنساوش أنه درنا تغييرات، وبرافو على الكروب والتنظيم ديالهم وهذا الشي كيعني أن الكروب كل مركز على الخدمة اللي كنديرو وفهاد الظرف، والدوزيام ميطا الخصم بدل اللعب بغاو يبريسيو علينا كثر والبلانتي اللي ضيعنا صعب علينا الماتش شويا، وعموما تحكمنا فالماتش وجا الهدف فالدقايق الأخيرة وفرحانين بزاف، والحاجة الإيجابية بالنسبة ليا هي أن الدراري اللي ماكيلعبوش لعبو واللي ما لعبوش عونوهم وكانت الروح كبيرة وسط الكروب وهاد هي الوداد العائلة”.

وكمل عادل رمزي وأكد: “حنا كنافسو على ثلاث واجهات، والبطولة عندها نفس الأهمية بحال العصبة  ولكن خاصنا نعرفو كيفاش ندبرو ونجيريو، وعندنا كروب كبير وفيه اللاعبين ولكن خاصك تعرف الأوقات المناسبة باش تجرب”.

ووضح عادل رمزي: “المشكل اللي طحنا فيه حنا هو العياء البدني والذهني واذا لاحظتوها فكاع الفرق اللي لعبو السوبر ليك تهلكو، وحنا كنحاولو نخرجو من هاد الظروف، واليوم لعبو لاعبين اخرين وجبنا 3 بوان والدراري الآخرين اللي كانو كيلعبو ريكيبيراو وهذا الشي إيجابي، برافو على اللاعبين راه كل 3 جور كيلعبو ماتش والعيا د السفر وحتى أنا درت لعاب ولكن الضغط والنتائج ما كيرحموش.. الفريق قدم مستوى تصاعدي من البطولة للسوبر ليك ونزل من بعد المستوى ماشي حيث تلفات لهم الكورة ولكن بسبب العيا وحنا كنرجعو دابا”.