كود سبور//
تأسف عادل رمزي مدرب الوداد الرياضي لخسارة الفريق لفينال السوبر ليك الإفريقي اليوم الاحد مع ماميلودي صن داونز الجنوب إفريقي، وأكد أنه راضي على اللاعبين وغيعوضو الخسارة بالألقاب مستقبلا.
وتحدث عادل رمزي بعد خسارة الوداد الرياضي مع صن داونز الجنوب إفريقي بجوج لزيرو، وخسران لقب السوبر ليك وقال فتصريح له: “كنتأسفو على هاد الماتش وباش نرجعو لماتشات السوبر ليك ماتش بماتش راه عطاونا ثقة كبيرة وكنا مقتانعين وعندنا ثقة فالقدرات ديالنا باش نجيبو الكأس”.
ووضح عادل رمزي: “الماتش ديال اليوم كان صعيب والعامل البدني لعب دور كبير وهما كانوا اكثر رشاقة وكانوا أحسن فالطراوة البدنية وخصوصا فالشوط الأول”.
وكمل مدرب الوداد: “ما لعبناش الكورة ديالنا كيف موالفين وعلى العموم الفريق قدم فالمسابقة عرض كامل وقدم الفريق عرض مزيان، الكاس بغيناها ولكن هذه المباراة الأخيرة هي اللي حددت الرابح”.
وختم عادل رمزي: “كنبارك لصن داونز ومقتنع بالمردود اللي قدمو اللاعبين ولكن بغينا نربحو الألقاب وخسارة اليوم صدمة لينا حيث كنا ثايقين غناخدو لاكوب وهذا هو المكتب وحنا فالطريق الصحيح وغنحاولو نعوضوها”.