كود الرباط//

في سابقة من نوعها، تم فتح تحقيق قضائي على شريط فيديو فيه تمثيل النسخة المغربية ديال “blind dating by outfits”، واللي مثلت فيه شابة مغربية مقيمة بهولندا وتزادت فالدنمارك.

الفرقة الوطنية للشرطة القضائية، دخلات على الخط وبدات البحث في شبهة المساس بالأخلاق العامة، بعد تداول هاد الشريط لي كيحاكي برنامج أجنبي.

وباشرت الفرقة الوطنية للشرطة تحرياتها بعدما تحال على مكتبها الوطني لمكافحة الجرائم المرتبطة بالتكنولوجيات الحديثة خلاصات جرد ومعاينة وقائع الشريط، باش دير بحث فيها، وذلك تحت إشراف النيابة العامة المختصة.

دبا هاد الشابة المغربية بنت الوقت، بنت جيل جديد، كيأمن بالأوتفيت، لابسا شورط وعادي كأيها بنت مغربية عصرية، مثلت، ورغم ذلك طلبت الاعتذار للمغاربة فحالة يلا تساء ليهم. هادي مدارت حتى حاجة خايبا فالفيديو من غير تمثيل. وكتفتخر بلي عندها كلبة كتبغيها وميمكنش تعيش مع شي راجل مكيتقبلش الكلب.

وقالت الشابة ارماني (حسب شريط فيديو اطلعت عليه كود) بلي هادشي غير تمثيل وغير ضاحك متاخدوهش بجدية.

الغريب كيفاش يتم فتح بحث قضائي مع فيديو تمثيلي عادي، وممكن نشوف ما اكثر منو فالأفلام والمسلسلات المغربية واللي تم بثها في القنوات التلفزية، في المقابل ما يتمش فتح تحقيق في تهديدات إرهابية داعشية واضحة ومسجلة صوت وصورة، آخرها خطبة العيد بايت ملول لشيخ متطرف وقبلها تهديد بقطع الرقاب وتهديد بالحرب الأهلية.

واش من المنطقي يتم فتح تحقيق مع مغربية مقيمة بالخارج نشيطة فـ”سوشل ميديا” ولبسها هذاك وحقها، ولا حنا فدستور ما قبل 2011 وفقوانين متخلفة، وفمراقبة اللباس والكلام. واش ماشي من حقها فالواقع تختار الشريك لي بغات (علما أن هادشي غير تمثيل).

منهضروش على القانون الجنائي المتخلف، بشهادة الحكومات المتعاقبة فهاد السنوات الأخيرة، وبشهادة مختصين فالقانون، ولكن نهضرو على هاد الرقابة الجديدة على السوشل ميديا. إذن فهاد الحالة خاص يتم التحقيق مع ولد الشينوية ومع الشيخة مولينيكس ومع كاع لي كيمثلو ويديرو قوالب ف تكتوك. هادو مغاربة عايشين حريتهم فـ”تكتوك” ومضبرين شويا صريف.

الرقابة خصها تكون على اللي كيهدد فعلا النظام العام واللي كيهدد تدين المغاربة الوسط، واللي كيهدد الأمن الروحي، الرقابة خصها تكون على لي بغا يرد مدينة ايت ملول بحال الرقة ديال داعش.