كود كازا//

انتقد الباحث فمجال الدراسات الإسلامية، محمد عبد الوهاب رفيقي، الرسالة اللي كتبغي المسلسلات المصرية اللي مهتمة بموضوع الإرهاب توصلها للمتلقين، فاش كتتكلم على وجود تحالف بين ميريكان الجماعات الجهادية، واعتبر ان فهذشي “استخفاف كبيربالعقول”.

وشرح رفيقي، فتدوينة ليه فأحد المجموعات المهتمة بالإنتاجات التلفزية والسينمائية، أن هذ الفكرة ديال أن الجماعات الجهادية هي من صنع ميريكان، وممولة من الميريكان، وكل شيء كديرو بتواطؤ مع الميريكان، وأن النظام المصري كيواجهها بصدق، هي فكرة “فيها بزاف ديال السطحية والتغليط”.

وزاد، فانتقاد للمسلسل المصري “القاهرة كابول”، انه “ماكينش شي حد ينكر توظيف ميريكان للجماعات الجهادية فالحرب الأفغانية، لسبب واضح وهو هزيمة الاتحاد السوفياتي، ولأن تأسيس تنظيم القاعدة ببيشاور جا ف هاد السياق، وخا مكانش احتكاك مباشر”.

لكن فالمقابل، مايمكنش نقولو، حسب رفيقي، ان العداوة اللي كانت بين بلادن وميريكان من بعد ما مشا للسودان ورجع لافغانستان غير تمثيل، أو أحداث 11 شتنبر اللي القاعدة صورات الاعدادات ووصايا  “الشهداء” كانت غي تمثيل… “لكن هدشي متيعنيش اتفاقات مفضوحة مكشوفة لدرجة الضابط الامريكي تيوصل حتا لعند الخليفة يرسي معاه، ويرسل ليه المجاهدين”، حسب تعبيرو.

واكد انه حتى إلى كان شي تحالف او تواطؤ، راه كيكون ضروري بتنسيق وتنظيم مع الانظمة والمخابرات المحلية.