بصفتي انسان كيقدر الجمال والحوايج الجميلة اللي كترفه على الانسان ف الحياة، كنت من ديما معجب بتقافة الالتراس ف الملاعب المغربية والروح ديال التشجيع اللي جابت لملاعبنا، من بعد ما كانت خاوية ومملة وكيدخلوا لها العشرات والمسؤولين براسهم كيتشكاو من فراغها..

الشي اللي وقع البارح بين جمهور الراجا من بعد ماتش الحسيمة، حاجة محزنة بزاف. الماتش داز مزيان ف روح رياضية، الجمهور شجع وغنا وكلشي مزيان بدون اي اشارة لعنف ولا شغب. لكن ف اخر الماتش وقع الشي اللي ما تمناه ولا توقعو حتا واحد.

طبعا ماشي أول مرة فصيلين من جمهور الراجا غادي يتدابزوا ف الملعب. سبق وقع حادث مماثل ولكن ما كانوش فيه ضحايا ومر مرور الكرام وما خداش تغطية كبيرة. لكن صداع هاد المرة مثير للانتباه، خصوصا ان الفرقة رابحة وف عيد ميلادها ونتائجها مزيانة.

أنا ماشي من عشاق نظريات المؤامرة وما كنشيرش هنا لاي مؤامرة، السبب غادي يبان مع الوقت وغادي تتوضح الرؤية ونفهمو علاش ناض الصداع. التحقيقات الامنية راها مازال جارية ف هاد الاثناء وما نسبقوش الاحداث.

حادثة السبت تقريبا اول مرة يشهدها المغرب بنفس الحدة والتغطية الاعلامية، الشي اللي خلاها حديث الساعة عند اغلب الناس ف كازا سواءا كانوا متبعين الكورة ولا لا. والشي كذلك اللي خلى ردود الفعل تكون مختلفة وحادة بشكل عام.

شغب جمهور الكورة، أو التجمعات البشرية اللي بالالاف، حاجة طبيعية وماشي حاجة جديدة، دول أكثر تحضرا مننا واكثر رفاهية كتعرفها بشكل دوري. العنف حاجة طبيعية ف الانسان وكيبغي غير امتا يخرجها. الحادثة كانت متوقعة ومازال متوقعة ف المستقبل. اللي غير مفهوم هو عدم استباق الجهات المنزمة لهاد السيناريوات.

لوم الجمهور فقط حيت أغلبو أمي وعنيف هو تفكير سطحي كيتجاهل معطيات بزاف، أهمها فتح فقط 2 بيبان لعشرات الالاف وف ماتش اللي كيصادف عيد ميلاد الفرقة, بالاضافة الى تأخر الامن ف التدخل وعدم وجود منافذ الاغاثة اللي خاص السلطات تكون موفراها ف بحال هاد الحالات. لنفرض مثلا انه كانت اشاعة ديال وجود قنبلة ف الملعب، متأكد أن القتلى جراء التزاحم كانوا غادي يكونوا بالعشرات وماشي غير 2.

نعم، أغلب جمهور الكورة هو غير متعلم الى متدني التعليم ومستواه المادي ضعيف وعنيف، لكن هاد الشي كينطبق على أغلب المغاربة. جمهور الكورة، و بحال ف جميع دول العالم المتقدم والمتخلف، ما هو الا عينة من المجتمع اللي عايش فيه. ما نقدروش نعتبرو جمهور الكورة فئة معزولة على باقي المغاربة والمجتمع المغربي ملائكي. ضويرة خفيفة فقط ف موقع كود غادي تبين لك الى اي مدى المجتمع المغربي عنيف وغير آمن للعيش. شغب الكورة ما هو الا نقطة ف بحر كبير ديال العنف والفقر والظلم.

المثير كذلك هو بعض الاراء الغريبة اللي بغات تمنع الالتراس ككل والكورة ف المغرب بدعوى ما وقع نهار السبت، هاد الاراء، واللي اغلبها جاية من عند  ناس كيدعيو انهم متعلمين وكيمارسوا النخبوية والاستاذية على الاخرين، ما يمكن لي الا نعتبرها أراء لا تختلف اطلاقا على تفكير القذافي ولا صدام ولا أي نظام دكتاتوري اخر كيبغي يفرض نمط عيش واحد على الجميع حيث هو شايفو صحيح.

 فكرة المنع هي اول خطوة ف أي نظام دكتاتوري. لذلك ما غاديش نكون كنبالغ ادا قلت ان المخزن اقل أحادية وأبوية ف التفكير ديالو من مغاربة بزاف متعلمين باغيين يفرضوا ارائهم على الاخرين لمجرد انهم متعلمين.

الكورة ما يمكنش تتمنع، والالتراس جزء هام من الكورة ف المغرب وبلا بيه البطولة غتخسر بزاف لا ماديا لا معنويا. فراقي بزاف عمر ملعبها عمر بالجمهور حتا جات فكرة الالتراس وفكرة الديبلاسمون مع الفرقة اللي كانت شبه منعدمة. هاد الفرق ماشي نتا اللي غتخلص لها دوك الملايين اللي كتخلص بيها الخدامة واللعابة ديالها.

الحل ف رأيي المتواضع لتجنب مستقبلا بحال هاد الحالات، وباش بلا ما نكترو الهضرة بزاف، هو تعزيز المراقبة الامنية للجمهور، ويولي الدخول فقط للناس اللي فوق سن محدد وبالبطاقة الوطنية, بالاضافة الى زيادة عدد البوليس ف الملاعب. الدول اللي كتعرف ظاهرة الشغب كيكون ف ملاعبها قوات مكافحة الشغب اللي متدربة على هاد السيناريوات، ماشي مردة راس مالو زرواطة.

هذا زائد من الافضل يتم السماح لالتراس واحدة لكل فرقة من الباشاج، كثرة الالتراس ف نفس الـCurva غادي يجيب فقط الصداع اللي الجمهور ف غنا عنه.

العنف ف الملاعب ظاهرة اعمق من منع الجمهور، منع الجمهور ولا الكرة هو معالجة العرض بدل المرض، لذلك باش ما نعاودوش نطيحو ف نفس الكوارث، خاص الاح حوايج بزاف ف المجتمع المغربي، ومن أهمها: إلغاء عقلية المنع والوصاية على الاخرين.