كود سبور //

لاعبات المنتخب الإيراني لكرة القدم النسوية ممكن يواجهو مشاكل كبيرة إلا رجعو لبلادهم حسب بهلوي، السبب هو أنهم رفضو يغنّيو النشيد الوطني الإيراني قبل أول ماتش ديالهم فكأس آسيا اللي تقام فأستراليا، هاد التصرف تفهّم على أنه احتجاج ضد النظام الإيراني.

الأمير السابق لإيران، رضى بهلوي طلب من الحكومة الأسترالية تضمن السلامة ديال اللاعبات وتوفر ليهم الحماية، وقال فحسابو فموقع X أن اللاعبات كيتعرضو لضغط وتهديد من طرف النظام الإيراني، وأنهم ممكن يواجهو عقوبات إلا رجعو لإيران.

المنتخب الإيراني النسوي وصل لأستراليا قبل أيام قليلة من بداية الضربات الأمريكية-الإسرائيلية على إيران، وفالبطولة بقاو اللاعبات ساكتات مني تعزف النشيد فالماتش اللول، ولكن من بعد غنّاو النشيد فماتشات أخرين تحت الضغط.

هاد الموقف اعتبرو الإعلام الرسمي الإيراني نوع من التمرد، ووصف بعض المذيعين اللاعبات بأنهم “خونة الحرب” فالمقابل، تجمع عدد من الناس خارج الملعب فأستراليا وطالبو حماية اللاعبات، وسط مخاوف من أنهم يتعرضو للمحاكمة إلا رجعو لبلادهم.