كود سبور//

مشى اللاعب المغربي رضا علاوي من الفتح الرياضي يلعب فبطولة النگليز.

وأعلن هال سيتي النگليزي، عن التعاقد مع اللاعب رضا علاوي مول 20 عام، وسناو معه عقد المدة ديالو 4 سنين، مع إمكانية يزيد معهم عام آخر.

وكايلعب رضا علاوي فوسط التيران، وفايت له لعب 24 ماتش مع المنتخب الوطني المغربي لأقل من 20 عام.

وقال رضا علاوي فتصريح نشروه هال سيتي على موقعهم الرسمي: “هذا فريق معروف فالنگليز وكان من الأحلام ديالي نعلب فبطولة النگليز، راه من أحسن البطولات فالعالم، وراني هنا باش نطور راسي”.

وكمل وقال: “كانخدم ديما على قبل الفريق وكانلعب ديما على الرباح وراني جيت هنا باش نربح، وباغي غير إمتى نشوف الجمهور وغاندير اللي فجهدي باش نفرحهم”.