كود سبور//
مازال كايحس رضا سليم لاعب الأهلي المصري واللاعب السابق للجيش الملكي، بالظلم من داكشي اللي تعرض له فالرجاء الرياضي حسب ما قال، وأنهم جراو عليه من النادي ملي كانت عندو 15 عام وبلا سبب، قبل ما يمشي يجرب زهرو فليفار اللي قال أن الفضل ديالو كبير عليه فهاد الشي اللي وصل له.
وكشف رضا سليم خلال حوار مع قناة الأهلي المصري: “أنا من الدار البيضاء، بصراحة من الناشئين ديال الرجا وكنت معهم ولكن وقع ليا مشكل معهم جراو عليا بلا سبب وكانت عندي 15 عام، وكنا كانتدربو بشكل عادي حتى قالو ليا الاسم ديالك ما كاينش ما تدخلش للتيران، بكيت بزاف حيث كانتريني مع الرجا وبين ليلى وضحاها كايقولو لك الاسم ديالك ما كاينش، ملي غاترجع للدار شنو غاتقول لكعائلتك راه الوالد كان كايحيد من مصروف المعيشة باش يعطيني نمشي نتريني كانت الحياة شويا صعيبة، ملي خرجت من الرجا ما عرفتش شنو ندير، مشيت للدار وهضرت مع عائلتي وشرحت لهم شنو وقع ليا، أنا ما درت حتى مشكل فالرجا جات إدارة جديدة ومدربين جداد قالو ليا شكون انت، الاسم ديالك ما كاينش، السلام عليهم..”.
وبخصوص كيفاش جا الالتحاق بالجيش الملكي، وضح رضا سليم: “عمي كايعرف شي حد فالجيش الملكي، قال ليا غانديرو له تيست ومشيت للرباط، وكانو بزاف باغيين يديرو تيست، أنا شافني محسن بوهلال اللاعب السابق للجيش الملكي شافني لعبت الماتش وقالي غدا تجي، الغد له مشيت من الرباط لسلا درت تيست قالوليا سير جيب حوايجك وجي راك نجحتي فالتيست ومن تما بدات المسيرة، وأنا الجيش الملكي عندو فضل كبير عليا، ملي بديت نبان الرجا تفكروني وهضرو معيا باش نرجع وكنت مازال ما سنيتش، وملي هضرو معيا ما رضيتش نرجع حيث المشيا اللي مشيت من الرجا مازويناش، كون صيفطوني حيث درت شي حاجة او شي مشكل نمشي بحالي ولكن هما صيفطوني بلا سبب، وهذا الشي باقي مكعيني حتى لدابا”.