كود سبور//

قرر حارس المرمى الدولي رضا التگناوتي يدير حد للمسيرة ديالو مع المغرب الفاسي، بعد موسم واحد دوزو مع الفريق.

وبعدما دوز موسم صعيب مع المغرب الفاسي، بسبب الاصابات وخصوصا الاصابة اللي كانت جاتو الموسم قبل الماضي فمعسكر المنتخب المغربي، اللي أثرت عليه بزاف، ومن وراها انتقل من الوداد إلى المغرب الفاسي، وما لعبش بزاف مع الماص حيث ما كانش واجد بدنيا، قرر رضا التكناوتي يمشي بحالو من المغرب الفاسي اللي هو الفريق ديالو الام.

ويعتبر رضا التكناوتي من أحسن الحراس اللي دازو فالسنوات الماضية فالبطولة، وكان ساهم فتحقيق اتحاد طنجة للقب البطولة الاحترافية عام 2018، ومن وراها ربح البطولة الاحترافية 3 المرات مع الوداد الرياضي ولقب دوري أبطال افريقيا مع الفريق الأحمر، وكان مع المنتخب المغربي فمونديال 2022.