كود -وكالات//

رشيدة داتي قدّمات الاستقالة ديالها من منصب وزيرة الثقافة لبارح  لاربعا باش تركز كاملين على الحملة الانتخابية ديالها فانتخابات بلدية باريس، اللي غادي يتدارو فـ15 و22 مارس. القرار ديالها كان متوقع، حيث منين علنات باللي غادي تترشح لمنصب عمدة باريس، بزاف ديال الناس كانو كيتسناو أنها تخرج من الحكومة قبل الحملة الرسمية.

فـتصريح لقناة BFMTV، قالت داتي: “غادي نبدّل باريس وحياة الباريسيين”، وأكدات باللي قدّمات الاستقالة  لرئيس الجمهورية إيمانويل ماكرون ،من جهتو قصر الإليزيه خرج ببلاغ قال فيه باللي الرئيس شكرها على الخدمة ديالها فهاد  العامين اللي دوزات فالحكومة، وعبّر ليها على الدعم الكامل  فالحملة ديالها.

من بعد هاد الإعلان، خصومها السياسيين ما ضيعوش الفرصة باش ينتاقدوها، الاشتراكي إيمانويل غريغوار قال باللي أخيراً غادي تكون متفرغة، واعتبر باللي الفترة ديالها فوزارة الثقافة ما كانتش فيها إنجازات كبيرة، وهاجمها على تقليص الميزانيات، انا ديفيد بيليارد من حزب الخضر علّق بسخرية فموقع X وقال باللي دابا يمكن ليها تلقى الوقت باش تشارك فـالمناظرات التلفزية.

استقالة داتي جات  فوسط تعديل حكومي جزئي، خصوصاً من بعد ما استقلات أميلي دو مونشالين هاد ليام  من منصبها كوزيرة للحسابات العامة ملي تعينات رئيسة لديوان المحاسبة. هاد التطورات كتشعل المنافسة  قبل الانتخابات البلدية ديال باريس اللي باين غادي تكون سخونة هاد العام.