كود كازا ////

صادق مجلس الدار البيضاء هاد لعشية فدورة استثنائية على “اعلان النفعة العامة” بعدها “نزع الملكية لارض الفيلا الشهيرة فتقاطع شارعي الزرقطوني مع انفا ومساحتها 550 متر مربع. فيها كانت الڤيلا الشهيرة “موفيليي” اللي تريبات فظروف غريبة وتم القضاء على جزء من تراث الدار البيضاء المعماري.

مجلس المدينة اللي ترأسو الاستقلالي الحسين نصر الله سبقو اجتماع اخر “لجنة التعمير واعداد التراب والممتلكات والبيئة”. فهاد الاجتماع تم الدراسة والتصويت “اعلان المنفعة العامة” ثم “نزع الملكية لارض” ڤيلا موفيليي.

رئيس الجلسة اليوم برر هاد نزع الملكية اللي تصوت عليه بالاغلبية مع معارضة العدالة والتنمية. وضح الحسين نصر الله باللي اليوم ما كيهدروش على الرخصة اللي عند صحاب لفلوس باش يبنيو فبلاصة هاديك الارض اوطيل، بل على العقار. وذكر باللي الرخصة كتخرج باسم الشخص.

وذكر باللي نزع الملكية حق عيني ينص عليه القانون بعد ما كيعلنو على صفة “المنفعة العامة”، واشار باللي السلطة الادارية هي اللي عندها الصلاحية تعلن على صفة “المنفعة العامة”، وهو حق حصري ليها، وعليه انو بعد ما طلب عامل عمالة الدار البيضاء انفا ندرجوها فجدول الاعمال فمجلس المدينة مجبر يدرجها. قضية الدراسة والمصادقة بيد مجلس المدينة. طبعا باش قال ليهم العامل ديروها راه عارف باللي غادية تكون المصادقة.

كما ذكر بللي بعد المصادقة على “اعلان المنفعة العامة” و”نزع الملكية” لڤيلا موفيليي” غادية تمشي فمسطرة طويلة. تمشي عند الوالي ثم وزارة السكنى ثم الامانة العامة للحكومة.

من مبررات هاد الاسترجاع ذكر نائب عمدة الدار البيضاء بللي كاين ركود المياه فهاد البقعة. واش هاد الشي عندو اساس علمي؟ شكون عرف. راه كانت ڤيلا تماك هادي سنوات طويلة. علاش ما وقع ليها والو.

كيف قلنا الحزب الوحيد اللي صوت ضد القرار هو البي جي دي. عادي راهم فالمعارضة.

نوابو انتقدو القرار وقال للمجلس باللي خاصو مرسوم لنزع الملكية

نحس كبير تابع هاديك البقعة من نهار ريبو “ڤيلا موفيليي”. طار فيها عامل انفا السابق ظلما واخا ما عندو علاقة بقرار الهدم. ما تحاسبش العامل مدير الوكالة الحضرية بنعلي.

دابا مزيان مجلس المدينة ترجع ارض عندها قيمة. خاصها تعاود تبني ڤيلا جديدة كيف كانت. الجمعيات البيضاوية المهتمة بتراث مدينتهم خاصهم يبقاو فايقين حاضيين من شي تقوليبة. خاص تخرج المنفعة العامة باش ما يقرب منها حتى شي هراف يهرف عليها