گود سبور//
طلع الملايري محمد بوزوبع اللي خدام فالبني، (طلع) كرئيس مجلس جديد للمغرب الفاسي، وكلفو المنخرطين د النادي بالملاءمة القانونية للشركة الرياضية للنادي.
وخلال الجمع العام ديال المغرب الفاسي، اللي انعقد اليوم الاحد 10 غشت 2025، تم التصويت على تفويض الملاءمة د الشركة الرياضية لنادي المغرب الفاسي ومنح الصلاحيات للمكتب المديري الجديد واتخاذ الإجراءات لتصحيح الوضعية القانونية للشركة الرياضية للنادي.
وقدم المكتب المديري للمغرب الفاسي اللي كان على راسو هشام شاقور الاستقالة ديالو، ومن بعدما انتخب المكتب الجديد اللي على راسو محمد بوزوبع على رأس النادي، بعدما تقدم كلائحة وحيدة مترشحة للرئاسة المغرب الفاسي.
ودابا راه محمد بوزوبع قدام مسؤولية تاريخيّة باش يرجع المغرب الفاسي للتاريخ ديالو، بعدما اتافقو المنخرطين والرؤساء السابقين على الدعم ديالو وحتى الجمهور عاطيه الدعم، والسؤال المطروح واش غايگد عليها ولا حتى هو غير مروج وغايغرقها وغايخليها ويهرب كيف دار إسماعيل الجامعي قبل منو؟