كود سبور//

ضمنو الوداد الرياضي الخروج بزيرو لقب فأول موسم لهشام ايت امنا فرئاسة النادي، ملي تقصاو من ثمن نهائي كاس العرش السبت مع المغرب التطواني الفريق اللي لاعب على الطيوح وغارق فالمشاكل.

وسالا الماتش بين المغرب التطواني والوداد  الرياضي، اليوم السبت فتيران سانية الرمل فتطوان بنتيجة واحد لزيرو لمصلحة التطوانيين، وماركا هدف الرباح أيوب الكحل فالدقيقة 79، قدام عجز الوداديين والمدرب ديالهم الجنوب افريقي رولاني موكوينا، وكانوا تطوان يقدرو يزيدو الهدف الثاني فاللحظات الاخيرة ولكن الكورة ضربت فالبوطو وخرجات.

وبهذه النتيجة تأهلو المغرب التطواني إلى ربع نهائي كأس العرش، وبالمقابل تقصاو الوداد الرياضي من الثمن، وضمن الفريق رسميا الخروج يزيرو لقب فهذا الموسم، بعدما خرج من سباق المنافسة على البطولة الاحترافية مع نهاية مرحلة الذهاب، ولاقي صعوبة حتى فتحقيق المركز الثاني المؤهل إلى دوري أبطال إفريقيا، في انتظار المشاركة ديالو فمونديال الاندية الموسم الصيف الجاي.