گود سبور//

مشات العصبة الوطنية لكرة القدم الاحترافية للقضاء بسبب تصريحات ديال عبد الواحد زمرات مدرب اتحاد التوارگة، اللي أثارت التصريحات ديالو بعد القرارات اللي عرفها ماتش الفريق ضد نهضة الزمامرة السبت الماضي ضمن منافسات البطولة جدل كبير.

وحسب مصادر جورنال “گود”، حطات العصبة الوطني لكرة القدم الاحترافية شكاية عند النيابة العام اليوم الثلاثاء، وطالبت بفتح تحقيق بسبب تصريحات عبد الواحد زمرات مدرب اتحاد التواركة، اللي قال انه شاف مدير مديرية التحكيم رضوان جيد تواصل مع حكيم الفار بالتيليفون وسط الماتش وعطاه توجيهات.
ونايض الصداع ملي سالا ماتش اتحاد التواركة ونهضة الزمامرة السبت اللي فات برسم منافسات البطولة الاحترافية، واستقالت مدرب التواركة عبد الواحد زمرات والمدير الرياضي للفريق ورئيس النادي احتجاجاً على التحكيم وزادت شعلت بعد تصريحات مدرب التواركة اللي قال ان مدير مديرية التحكيم عيط على حكم الفار وسط شي ماتش.