احمد الطيب كود الرباط//

رسميا التعديل الحكومي كاين، والسبب الرئيسي لي بان اليوم هو تعيين سيدنا لشكيب بنموسى مندوبا ساميا للتخطيط بلاصت أحمد الحليمي، وبالتالي مبقاش فالحكومة ومشا من منصب وزير التربية الوطنية والتعليم الأولي والرياضة.

وحسب مصادر “كود” التعديل الحكومي، غايكون فالساعات المقبلة، أولا لتعويض حقيبة بنموسى فالحكومة، وترميم الحكومة وإعادة توزيع الحقائب كيف كتروج قيادات حزبية داخل الأغلبية. غير لي خايب هو أن بعض الأسماء بدات كتروج بلي غاتشد مناصب حكومية، أسماء بلا كفاءات ومنهم لي سبق فشلو فمناصبهم وتسببو غير فالكوارث.

العجيب هو أن شي قيادية مقربة من فاطمة الزهراء المنصوري، منسقة القيادة الجماعية لحزب الاصالة والمعاصرة، كتروج على راسها بلي غاتشد منصب حكومي. هادي راه سبقات إعلان سيدنا على تعيين الوزراء الجدد، وهادي ما خلات لمن قالت بلي غادخل للحكومة، خصوصا الباميين ديال كازا.

هاد السياسية لي فالبام، بغات تشد منصب فالحكومة وكتروج بلي راها داخلا للحكومة، هادي مبقا ليها غير تولي ناطقة باسم القصر وتعلن على شكون تعين وتعفى فالوزراء والولاة والعمال. شي وزراء جات الوقت يمشيو يرتاحو، ضعف ف الاداء وغباء فالتواصل وسوء التدبير والتسيير فكولشي.