كود ابيدجان ///

رسميا كاين تدشين كبير للمسرح الملكي بالرباط شهر ماي. منين جات لخبار. البارح لثلاث 14 ابريل 2026 فحفل دارتو الخطوط الملكية المغربية فاوطيل بالعاصمة الايڤوارية ابيدجان لانها السبونسور الرسمي لمهرجان سوق فنون العرض الافريقية “ماسا”، كان من بين اللي خداو الكلمة كوماري المدير الحالي ل”ماسا”. هدر باسم المهرجان اللي فدورتو 14 ودوز ميساج من وزيرة الثقافة للمغرب ول”لارام” كان فيه شكر وعرفان باللي كديرو هاد الشركة المغربية.

فكلامو طلق سكوب كيتساوه لمغاربة العاشقين للثقافة والفن كيهم معلمة كبيرة للي هي المسرح الملكي ببو رگراگ. كلماتي قال باللي تلقى دعوة رسمية من المغرب باش يعرض تدشين “المسرح الملكي”.

كيفاش حدث بهاد الاهمية نسيقو ليه لخبار فابيدجان. هادا جانب خايب فمغربنا. شي وحدين ما قدروش يتخلصو من هاد العادة المهينة غير ليهم. المهم “كود” سولات كوناتي على موعد هاد الافتتاح الرسمي، ما بغاش يعطي تفاصيل كثر، غير هو اكد باللي هاد الافتتاح غادي يكون فشهر ماي.

هاد المعلمة لكبيرة كانت سالات هادي مدة. واش كانو يتسناو تدشينها حتى دشن “برج محمد السادس” ول البارح من قبل ولي العهد؟ محتمل جدا. لكن راه تعطل وحتى زيارة ماكرون عاد خرج خبار باللي “الأميرة للا حسناء، مرفوقة ببريجيت ماكرون، اليوم الثلاثاء، على تدشين المسرح الملكي الرباط، المشروع الهيكلي الذي يأتي لتعزيز منظومة مدينة الأنوار، عاصمة المغرب الثقافية”.

طبعا ماشي تدشين. لان التدشين كيعني عندك برمجة فنية مقادة. عندك حفل كبير يكون فافتتاح التدشين. ودازت شهورا وايام عاد ف15 ماي 2025 تعلن على انشاء مجلس ادارة للمسرح الملكي كترأسو الاميرة لالة حسنا. فداك النهار تعقد اول اجتماع. فاعضاء هاد المجلس كاينة الشيخة المياسة بنت حمد ال ثاني رئيسة مجلس امناء متاحف قطر وبريجيت ماكرون مرات ماكرون وعثمان بنجلون مول البنكة ومايكل زاوي حتى هو بنكي وهدى الخميس كانو وگاد المالح وميشيكل كانيزي وهيلين ميرسي ارنو مرات لملايري لفرنساوي ارنو وفريد بنسعيد ديال فيلارمونيكا المغربية ووالي الرباط محمد اليعقوبي. غاب عليها وزير الثقافة اللي ما فيدوش.

المسرح اللي بدعاتو المهندسة العالمية العراقية زها حديد. مساحتو 7,1 هكتارا، منها 25 ألف و400 متر مربع مبنية. فيه قاعة كبيرة للعروض كتهز 1800 متفرج وفيه قاعة ثانية للعروض فيها 250 مقعدا، مفتوحة لاحتضان كافة التجارب والتعبيرات الثقافية بأساليبها وأنواعها المتعددة والمختلفة، لتصبح بمثابة رافعة للمشهد الفني المغربي الجديد.

الفضاء الخارجي فيه مدرج كيهز 7 آلاف شخص، مخصصا لاحتضان المهرجانات والتظاهرات الكبرى.

عنداك غير فهاد التدشين المغربي لفضاء مغربي يعرضو على صحافة العالم ويهمشو صحافة المغرب كيف وقع فاكثر من حدث