مصطفى الشاذلي -كود سبور///

اليوم السبت، تلعب برسم الجولة ال 26 من الدوري الاحترافي لكرة القدم، الديربي بين قطبي الكرة فكازا الوداد والرجاء، وذلك في المركب الرياضي محمد الخامس بالدار البيضاء وتخسرات عليه فلوس كثيرة. لكن حفل عودة هاد الملعب الاسطوري باش يحتاضن الماتشات كان فاشل. البارح شفنا فضيحة دارتها “سونارجيس” اللي مكلفة بتدبيرو٬ باش جابو مواطنات من افريقيا باش ينظفوه وما خلصوهمش واحتجو. كيفاش جابو هادو وواش خدموهم بشكل قانوني٬ وعلاش ما بغاوش يخلصوهم حتى ناضت لفضيحة.

لكن الرسالة الاوضح لبيضاوا فافتتاح الملعب التاريخي لبيضاوا كانت مقاطعة جماهير الوداد والرجاء للديربي اليوم.

مقاطعة عندها رسالة واضحة: حنا كجمهور تعذبنا وتسخسخنا فهاد السنوات الاخيرة. ما عندناش ملعب لعبو فيه. مرة لاعبين فبرشيد. مرة فالمحمدية. مرة فالعربي الزاولي. جماهيرنا ديما ممنوعة حتى تتفرج فماتشات خارج كازا. تابعو اعضاء من الالتراس من جماهير الخضرا والحمرا وضربو بالسجن النافذ. درتو لمدينة بحال الرباط فكأس افريقيا المقبلة 5 تيرانات وحتاقرتو مدينة رياضية كروية بحال كازا. طبيعي ما نقاطعو الديربي.

هاد الملعب اللي كيهز دابا 45 الف مشجع عمروه باللي بغيتو الا جمهور الكورة. ديك التقنيات الجديدة كولوها. حتى سالى الموسم وربحات بركان البطولة عاد جايين ضحكو على كازاوا.

دابا هاد المقاطعة اللي نجحات راها رسالة ماشي غير رياضية. كلشي خاصو يفهمها مزيان