جواد_الأنصاري

—

شي خبار يتم تدوالها هاد الايام عند المهتمين بهادشي ديال العيلم كتقول بلا أنه كاين واحد البلان يدعى “breakthtough starshot” خصصت له ميزانية ضخمة تقدر ب 100 ألف دولار أمريكي، وللي غيتكلف به الملياردير الروسي يوري ميلنر بتنسيق مع مول لفيسبوك مارك زوكربرج، وبإشراف من العالم الفيزيائي الأشهر ستيفن هوكينغ،والهدف من هاد المشروع هو أنهم بغاو يصيفطو مركبة فضائية صغيرة لا يتجاوز حجمها بضعة غرامات، في رحلة سياحية للفضاء ،تستغرق ما يناهز عشرين عام، باش يقلبو لينا على واش كاين شي كائنات فضائية كنتقاسمو معها هاد الكون ولا غي بوحدنا هنا ،

وهاد المبادرة كانت هادي واحد المدة طويلة وهيا حيز التخطيط إلى غاية 12 فهاد الشهر لي تم الإعلان عن التحضير النهائي والرسمي لإنطلاق الرحلة، للي كانت بمثابة حلم يتمنى تحقيقه ستيفن هوكينغ من شحال هادي، حيث كان عندو ديما واحد الهاجس مقلق يُلازمه حول إحتمالية وجود كائنات حية ذكية في الفضاء كتشكل واحد خطورة كبيرة على البشرية وعلى كوكبنا العزيز و فرضية وجودها حسب ما يدعيه واردة جدا ،وبناء على هادشي قرر باش ينوضو يقلبو لينا على هاد لعجب المتعجب ،

وإستنادا لداك لمثل لي كيقول “لا تبحث عن المفقود حتى لا تفقد الموجود” كنقترحو على سي ستيفن هوكينغ وسي زوكربرج وميلنر باش يوفرو عليهم عناء البحث وفليساتهم ويجيو يبقشو شوية غير في العالم الافتراضي الازرق الفيس بوك وغادي يلقاو بعض الكائنات العجيبة التي يمكن إدراجها في خانة “ما لا عين رأت ولا خطر على قلب بشر” وإنشاء دراسة حولها ،لاش غادي بنادم يضرب هاد لعذاب كاملو ، فقط لإشباع الفضول البشري في حين أنه عوضا عن ذلك ومن باب أولى هاد الكائنات هي في حاجة للرعاية والمعاينة الميدانية ولبزاف ديال التجارب .

وفي إعتقادي أيضا ومن ناحية خرا كان بإمكان هاد المجهودات الجبارة والجرأة والزبابل ديال لفلوس يتصرفو بعدا غير على ود محاربة الحزقة مثلا للي كتعاني منها عينة كبيرة من البشرية ولا مشكلة الاحتباس الحراري ،والجهل ،والأمراض المزمنة ،ولحد من المد الداعشي، والقضاء على التطرف،وبزاف تلحوايج

شبينا وبين ديلمهم حنا هاد لارواس ديال لكائنات الفضائية، باش نمشيو نقلبو عليهم، حنا بالله او بشرع معهم أوديني ،

واش غنبقاو دايرين عقلنا فستيفن هوكينغ ،؟السيد را غي حزق ليه لفريخ، وبدا كيهلوس،

و من حسن حظو ومن سوء حظ لبشرية انه ماتزادش عنا في المغرب أما كراه تلقاه دابا شاداه شي شيبانية كتطلب به حدا الجوامع …ولا تلقاهم داينو لمكي الصخيرات يدوز ليه …

وهادشي نيت لي من المفروض أنهم يقومو به على هاد لحساب دوك المحسنين لي بغاو يغامرو معه فهاد لبلان ديال رحلة الفضاء ، خصهم يديرو غا النية ويجيبوه للمكي الصخيرات …وما يكون غير لخير إن شاء الله تعالى