الرئيسية > آش واقع > رد على تسريبات التعديل الحكومي.. أخنوش علن دعمو لوهبي فأول نشاط رسمي مور العطلة وثمن الخدمات الالكترونية فالعدل
13/09/2022 16:30 آش واقع

رد على تسريبات التعديل الحكومي.. أخنوش علن دعمو لوهبي فأول نشاط رسمي مور العطلة وثمن الخدمات الالكترونية فالعدل

رد على تسريبات التعديل الحكومي.. أخنوش علن دعمو لوهبي فأول نشاط رسمي مور العطلة وثمن الخدمات الالكترونية فالعدل

كود الرباط//

عزيز أخنوش، رئيس الحكومة، داير دعم كبير لعبد اللطيف وهبي، وزير العدل وأمين عام الاصالة والمعاصرة، بحيث مباشرة من عودته من العطلة فأول نشاط دارو وهبي حضر ليه اخنوش.

وجاء هاد النشاط الوزاري، بعد اسابيع قليلة من تسريب اخبار عن تعديل وزاري مرتقب اواخر شهر غشت واللي نشرات جون افريك، وهضرات فيه على جوج وزراء غايطيرو على رأسهم عبد اللطيف وهبي.

أخنوش حضر ودار كلمة حول إطلاق وزارة العدل لأربع خدمات رقمية يوم الثلاثاء 13 شتنبر 2022 بسلا.

وقال اخنوش :”لجائحة فرضات علينا مجموعة من التحديات لي خلاتنا نديرو هاد الثورة الرقمية فالإدارات العمومية”.

اخنوش ثمن مبادرة وهبي باطلاق هاد الخدمات الالكترونية، خصوصا وأنه مغايبقاوش وثائق غايبقا يمشي المواطن يجيبها من المحكمة من قبيل السجل العدلي.

وقال وهبي خلال تقديم هاد الخدمات :”بواسطة خدمة السجل العدلي الإلكتروني، أصبح بإمكان الإدارات تولج لهاد الخدمة بلاصت تطلب من المواطن يجيب الورقة”، مؤكدا انه مبقاش معنى نطلبو من المواطن يجيب هاد الوثيقة باش يدوز مبارة فالقضاء او المحاماة او من مهاجر خارج ارض الوطن.

يشار بلي رئيس الحكومة، عزيز أخنوش، إلى جانب وزير العدل، عبد اللطيف وهبي، مرفوقين بعدد من المسؤولين رفيعي المستوى، عطاو الانطلاقة الرسمية لمجموعة من الخدمات الرقمية بقطاع العدل منها المرجع الوطني لمنتسبي العدالة؛ والسجل العدلي؛ ومركز “نداء”؛ والمخالفات الإلكترونية.

موضوعات أخرى