كود سبور//

رد النجم المغربي براهيم دياز على مدير المنتخبات الإسبانية السابق، اللي خرج قبل ايام كايدّعي أن نجم ريال مدريد ما فرحانش دابا حيث ما اختارش الصبليون.

الفرحة العفوية لابراهيم دياز بالوصول للمغرب اليوم الاثنين والنشاط ديالو وهو داخل مع باب مركب محمد السادس لكرة القدم، اللي هو واحد من أحسن مراكز التدريب والتكوين فكُرة القدم فالعالم، والابتسامة اللي على وجه نجم ريال مدريد حيث رجع لبلادو، هو رد قوي وعفوي منو على مدير المنتخبات الإسبانية السابق ألبرت لوك، اللي خرج كايدّعي أن ولد عبد القادر ما فرحانش دابا وأنه بقى فيه الحال حيث ما لعبش اليورو مع الصبليون.

وكان ألبرت لوك خرج خلال حوار على البرنامج الإذاعي “إل لارگويرو” على إذاعة “كادينا سير” ونشراتو جريدة “موندو ديبورتيفو” الإسبانية، كايخرج فعينيه وكايقول إن براهيم دياز بقى فيه الحال حيث ما اختارش الصبليون وأن اللعب فاليورو ضد الطاليان ماشي هو اللعب ضد المنتخبات الإفريقية، وأن براهيم دياز حتى عرف بلي بلاصتو ما كيناش مع المنتخب الإسباني عاد اختار المنتخب المغربي، مع العلم أن هذه الرواية مردود عليها ومن طرف مدرب إسبانيا لويس دي لافونتي اللي كان قبل قبل ما يجي براهيم دياز للمنتخب المغربي، انه حاول يقنع ولد عبد القادر، ولكن اللاعب كان حاسم القرار ديالو واختار يلعب مع المغرب.