كود الرباط//

علمت “كود” من مصدر مطلع أن حزب الأصالة والمعاصرة، كيوجد لاجتماع موسع بين المكتب السياسي والمسؤولين الجهويين والشبيبة باش يدير جامعة صيفية كتنافس الجامعة الصيفية لي دار الأحرار ف أكادير.

البام حسب مصادر “كود” اختار بوزنيقة المدينة لي تدار فيها أول مؤتمر للحزب، وختار يكون هادشي بين 19 و21 شتنبر، بحيث غادي تعرف الجامعة مشاركة ما بين 400 و500 عضو في الحزب.

قيادي فالبام قال لـ”كود” الافتتاح ديال فعاليات النسخة الأولى من الجامعة الصيفية، مغاديش يكون فيه حفل، وغاتكون كلمة سياسية للمنسقة، مؤكدا بلي البام اختار يقطع مع الأسلوب ديال الفراجا والموسم ف تنظيم الانشطة ديالو خصوصا فهاد السياسي.
وحسب ذات المصدر، البام مغاديش يسكت على مشاهد الحريك فسبتة وغايعبر بصراحة عن موقفه وغايدعو الحكومة تواصل بهذا الشأن، مشددا بلي الكلمة السياسية فالافتتاح غاتكون فيها انتقادات للحكومة.

وأكد القيادي فالبام لـ”كود” بلي حتى الشعار ديال هاد الجامعة فيه رسائل وهو شعار: «تعاقد متجدد من أجل الكرامة والأمل»، هنا كنهضرو  ازمة الكرامة فالبلاد.

ويأتي هذا الحدث، وفي مذكرة تقديمية للجامعة الصيفيفو،  في سياق سياسي صعب يقتضي مناقشة القضايا الوطنية الكبرى مثل تحديات العمل السياسي ببلادنا، الانعكاسات الاجتماعية للذكاء الاصطناعي، حرية التعبير في العصر الرقمي أزمة الماء، تفعيل ترسيم الأمازيغية، ومواضيع أخرى، وذلك بهدف تزويد المشاركات والمشاركين في هذه الدورة بالمعرفة والمهارات اللازمة ليكونوا مساهمين وفاعلين في التغيير المجتمعي المنشود.