وكالات//

ماتت واحد السيدة تركية فبداية الأربعينات من عمرها، بسبب كَرادة لصقات ليها فالجسم ونقلت ليها فيروس خطير سميتو “حمى القرم–الكونغو النزيفية”.

حسب الإعلام التركي، السيدة اللي سميتها “فيدان تشيكوتش” وعندها 42 عام، مشات قبل حوالي سيمانة لمستشفى فولاية “تشانكري” اللي فوسط تركيا، وكانت كتشكي من السخانة.

الأطباء شكّو أنها تصابت بالفيروس عن طريق قرادة، وقرّرو ينقلوها لمستشفى آخر متخصص فـ نفس الولاية، ومن بعد حتى هوما قرّرو يبعثوها لمستشفى فالعاصمة أنقرة، ولكن مع الأسف، ماتت بعد حوالي سيمانة من المحاولات باش ينقذو حياتها.

هاد السيدة، اللي كانت أم لخمسة ديال الولاد، خدامة فمجال تربية المواشي فدوار تابع لولاية “تشانكري”، وهي منطقة معروفة بكثرة الإصابات بالفيروس، خصوصاً عند الناس اللي كيخدمو مع الحيوانات، حيث القرادة كتنتاقل منهم.

ومن بداية هاد العام، وصل عدد الوفيات بسبب القرادة فتركيا لـ16 حالة، وهنا المختصين كينبهو الناس ياخدو الحيطة والحذر، خصوصاً اللي كيتعاملو مع المواشي، ولازم يغطّيو الجسم ديالهم مزيان باش يتفاداو الإصابة.