وكالات//

حذّرو خبراء باللي شي تغيّر دقيق فالعين يقدر يكون علامة مبكّرة على احتمال الإصابة بالخرف فسن متقدّم، حسب دراسة علمية حديثة كتبيّن باللي كاينة علاقة قوية بين صحة العين وصحة الدماغ.

والخرف هو اضطراب إدراكي كيتطوّر بشوية بشوية، وكيأثر على الذاكرة، والتفكير، والسلوك، وقد يوصل مع الوقت حتى يفقد الشخص القدرة يدير الأنشطة اليومية الأساسية ديالو. وحسب المعاهد الوطنية للصحة فالولايات المتحدة، الخرف كيطال أكثر من 6 ملايين أمريكي، وكيكون سبب فكثر من 100 ألف حالة وفاة كل عام.

وبيّنات دراسة تنشرات فمجلة Frontiers in Aging Neuroscience باللي سُمك شبكية العين يقدر يكون عامل مهم فالتنبؤ بخطر الإصابة بالخرف، وخصوصاً مرض ألزهايمر. فشبكية العين، اللي هي نسيج حسّاس كيغطي الجزء اللوراني ديال العين، كتعتابر امتداد للجهاز العصبي المركزي، وهاد الشي كيخليها بحال مراية للتغيّرات اللي كتوقع فالدماغ.

واعتمد الباحثين على تحليل معطيات ديال قرابة 30 ألف راشد دارو فحوصات ديال التصوير المقطعي بتماسك بصري (OCT) باش يقيسو سُمك الشبكية. وبيّنات النتائج باللي نقص فسمك الشبكية كيرتابط بارتفاع خطر الإصابة بالخرف بنسبة 3% مع كل تراجع فالسُّمك.