كود سبور//
عبر الدولي المغربي سفيان رحيمي على الفرحة ديالو بتأهل الأسود إلى ربع نهائي أولمبياد باريس 2024، وقدم هذا الإنجاز هدية للملك محمد السادس والشعب المغربي، وقال إنه فرحان حيث صبح هداف المغرب فالأولمبياد وباغي يزيد يماركي باش يفرح المغاربة اكثر.
وهضر سفيان رحيمي فتصريح له بعد فوز المغرب على العراق بنتيجة 3 لزيزو فالجولة الثالثة من أولمبياد باريس، وهو الماتش اللي ماركا فيه هدف رفع به الرصيد ديالو كهداف لأولمبياد باريس إلى 4 أهداف، وقال: “كانهديو هذا الرباح للملك محمد السادس للشعب المغربي والجمهور اللي حضر، ونتمناو نكملو فهذا المسار”.
وكمل سفيان رحيمي: “الماتش كان صعيب وقدرنا نسايروه بالاستراتيجية اللي بغاها المدرب ومشينا خطوة بخطوة ومن أول الدقائق قدرنا نفرضو السيطرة ديالنا وهذا الشي اللي وقع”.
وزاد رحيمي وقال: “عندي إحساس جميل حيث أنا هو هداف المغرب فالأولمبياد وكنتمنى نزيد نماركي الأهداف باش نفرح الجماهير حيث كايستاهلو”.
