كود سبور//

كيواصل الدولي المغربي سفيان رحيمي التألق فدوري أبطال آسيا مع العين الإماراتي، ونجح فتأهيل الفريق إلى دومي فينال المسابقة بعدما دار ماتش كبير ضد النصر السعودي بالنجوم ديالو اليوم الاثنين فروتور ربع النهائي فالسعودية.

سفيان رحيمي قدر يعطي التقدم للعين الإماراتي فالماتش بجوج بيوتا زوينين ماركاهم فالدقيقة 28 والدقيقة 45، وقبل ما يسالي الشوط الأول ماركاو النصر الهدف الأول، وفالشوط الثاني قدرو يدربو الهدف الثاني والثالث، وسالا الوقت الآصلي بنتيجة 3 لجوج للنصر، بالتالي تعادلو الفريقين فنتيجة الآلي والروتور بـ3 مقابل 3، ورحيمي وصحابو قدرو يجرو الماتش للأشواط الإضافية.

وفالشوط الإضافي الأول صيدو لاعب النصر أيمن يحيى اللي تطرد، وضربو الهدف الثالث من وراه، ولكن كريستيانو رونالدو ضرب الهدف الرابع فالشوط الإضافي الثاني وسالاو القرافي بجوج تعادل بنتيجة 4 مقابل 4، ومشاو لضربات الترجيح اللي سالا بنتيجة 3 مقابل 1 لمصلحة  العين الإماراتو والتأهل لنصف نهائي أبطال أسيا.

المستوى المزيان والمستقر ديال سفيان رحيمي ملي كان مع الرجاء الرياضي والمنتخب المحلي ودابا مع العين الإماراتي، كيأكد أنه خاصو ياخذ فرصة ديالو مع المنتخب الوطني المغربي.