گود سبور//

تألق الدولي المغربي سفيان رحيمي مرة اخرى مع العين الإماراتي، وهاد المرة قاد الفريق لتحقيق دوري ابطال آسيا بعدما ربحو فالفينال اليوم السبت فالإمارات، يوكوهاما الجابوني.

وسالا روتور فينال دوري أبطال آسيا بين العين الإماراتي ويوكوهاما الجابوني بنتيجة 5 لواحد لمصلحة الفريق الإماراتي، وقدر سفيان رحيمي يماركي الهدف الاول للعين فالدقيقة 8، وجاب لهم فالدقيقة 33 بيلانتي عطاه لصحابو كاگو ماركاه، وماركاو يوكوهاما هدفهم الاول فالدقيقة 40 بواسطة يان ماتيوس.

ومن وراها تحرك سفيان رحيمي ومع نهاية الشوط الاول قدر يتسبب فطرد گول يوكوهاما ويليام بوب اللي خدا الحمرا بعدما طيح النجم المغربي حيث ما لقاش شي طريقة اخرى يوقفو بها ويحبسو ما يماركيش عليه، وفالشوط الثاني نجح رحيمي وزاد الهدف الثالث للعين فالدقيقة 67، وزاد لابا كودجو الهدف الرابع فالدقيقة 91، ورجع من وراها نفس اللاعب وضرب الهدف الخامس، والعين وبمجموع أهداف لالي وروتور فينال دوري ابطال اسيا تفوق على يوكوهاما الجابوني بنتيجة 6 لـ3.

وبهاد المستوى اللي قدم سفيان رحيمي نجح النجم المغربي فقيادة العين الإماراتي لتحقيق دوري ابطال اسيا للمرة الثانية فالتاريخ ديالو بعدما غاب على البوديوم من 2003، وخدا هداف البطولة اللي ماركا فيها 12 هدف موزعة على شباك اندية كبيرة فأسيا وبنجومها العالميين من بينها النصر والهلال السعوديين، وصبح أول لاعب مغربي كيربح شومبيونزليگ الاسياوية.