كود احمد الطيب الرباط ///
اللي يستحق يكون رجل السنة ف2022 هو فوزي لقجع بكاسكيطة الجامعة الملكية لكرة القدم. هاد الشخصية تستحق تكون شخصية السنة لاسباب كثيرة عندها علاقة بكرة القدم.
من هاد الاسباب ان وصول المنتخب المغربي لكرة القدم لنصف نهاية كأس العالم قطر 2022 لعب فيه دور كبير. غادي نشرحو هاد الشي.
كذلك مع رئاسة فوزي لقجع لجامعة الكورة وصلات جوجت المنتخبات الوطنية للعالمية: منتخب النساء لكرة القدم اللي تأهل للمونديال والاسود داخل القاعة اللي مهيمن افريقيا وعربيا وربح القاب عالمية.
نبداو بالمونديال اللي دار فقطر. 31 غشت الاخير اي قل من شهر ونص ومن انطلاق المونديال ف20 نونبر اللي فات٬ قدم فوزي لقجع المدرب الجديد للاسود. قدم وليد الركراكي. خاصك تكون شجاع وانتحاري كاع باش تبدل مدرب للمنتخب الوطني والمونديال بقاو ليه قل من 9 السيمانات.
فوزي لقجع كان واثق من اختيارو. هاد الرئيس اللي قريب بزاف من اللعابة كان عارف انو مع وحيد خليلوفيتش المنتخب غادي يبقى ديما محتاط. ما غاديش يطلقو اللعابة.
شجاعتو كانت كبيرة ماشي غير فتغيير المدرب ولكن حتى فاختيار الركراكي. كان من المتوقع او كان اسم الحسين عموتة هو اللي رايج. لقجع بذكاء عرف ان تغيير وحيد بعموتة ما غاديش يبدل الاسود. ما غاديش يطلق اللعابة. عموتة يمكن فلوراق يستحق يكون مدرب ولكن قاصح وكيلعب باحتياط كبير وعندو مشكلة كبيرة فالتعامل مع لعابة جايين من اكثر من دولة وكيهدرو اكثر من لغة.
ذكاؤو خلاه يفكر فمدرب كيفهم هاد اللعابة. مدرب كيحررهم عوض ما يخنقهم فاللعب. مدرب اقرب منو لكوتش من مدير فني. مع وحيد خليلوفيتش المنتخب تقاد. الطريقة الدفاعية اللي شفناها فالمونديال كتشهد على خدمة المدرب البوسني. لكن لقجع كان حاس باللي مدرب يحرر اللعابة يقدر يمشي هاد المنتخب بعيد.
لقجع كان عارف باللي اللعابة ديال المنتخب كلهم فيديهم كرويا٬ خاصهم شي كوتش. شي قائد. يحمسهم. يحفزهم. يخليوهم “يمشيو”. يقول ليهم “سير سير سير”.
لهاد الشجاعة. لهاد القرار الانتحاري. يستحق لقجع رجل السنة ماشي شي حد غيرو. حقاش ايلي ربطنا المسؤولية بالمحاسبة خاصنا نحاسبو لقجع ونعطيوه رجل السنة. تصورو كون الاسود ما دارو والو فالمونديال. كان كلشي غادي يطالب براس لقجع. كلشي يبغيه يرحل.
فوزي ما دارش غير للمنتخب الاول لكرة القدم واللي وصل لنص نهاية كأس العالم. دار حتى لمنتخبات اخرى وطنية كيف ذكرنا فالسابق.
معاه فكرة القدم النسوية دخلات للمغرب. هاد البلد اللي ما كانش عندنا منتخب٬ ولى من الدول لكبيرة فهاد اللعبة افريقيا. المنتخب المغربي لكرة القدم اناث وصل لنهاية كأس افريقيا اللي دارت فالمغرب شهر يوليوز وجا الثاني. خسر ضد جنوب افريقيا.
اللبؤات تأهلن كأول منتخب فبلاد العرب للمونديال اللي غادي يتلعب العام الجاي فنيوزلندا.
مع فوزي لقجع تخلق منتخب وتخلقات اندية للنساء وولات كتربح القاب قارية. على هادي واللي تذكر فالسابق٬ يستحق يكون رجل السنة.
لقجع يستحق يكون رجل السنة كذلك حقاش حقق مع الكورة داخل القاعة نتائج كبيرة بزاف. الاسود داخل القاعة ربحو الالقاب الافريقية والعربية. ولينا عالميا فالرتبة 8 عالميا. هاد الشي حسب تصنيف 17 شتنبر 2022.
هاد المنتخب اللي كيشرف عليه هشام الركيك ربح هاد العام كأس القارات داخل الصالات بعد ما طيح منتخب ايران. وصل لربع نهاية كأس العالم.
هاد الشي بلا ما نهدرو علي الاكتساح اللي دايراه اندية مغربية فالقارة الافريقية. هاد العام لاول مرة فتاريخ الكورة المغربية الوداد البيضاوي ربحات الشامبانز ليك الافريقية وربحات نهضة بركان كأس الكونفدرالية الافريقية. السوبر كوب تلعب بين لمغاربة وداتو بركان.
علي هاد الشي كولو لقجع يستحق يكون شخصية سنة 2022.
