كود سلا//

واش دازت الدكاكة على النيابة العامة في سلا بواسطة محاضر الفرقة الحضرية للضابطة القضائية للأمن سلا، ليكان ضحية ديالها المسمى (س ي) رجل أعمال بدبي من مواليد بلجيكا تيسكن في طنجة مقيم في الإمارات وعندو فيها مشاريع ومطاعم؟

القصة تاع هاد رجل الأعمال اللي دابا مشدود في الحبس ممفهوماش حيث شي وحدين فبركوا ليه مساطر مرجعية، وكون غير كانت متقونة، معيقة، داكشي تاع سربك الضوسي.

السيد اللي عندو أسطول تاع السيارات والوقت لاعبا معاه مزيان، ملي بغا يرجع لدبي في شهر اكتوبر اللي فات وقفوه في مطارمحمد الخامس كالو ليه حقا الشرطة القضائية تاع سلا تايقلبو عليك، تفاجأ ملي وصل عند لا بيجي تاع سلا  في 13/09/2024 وقالو ليه بانه تسلف موطور تيماكس من عند المسمى ا. ف، و ملي رجع الموطور لمولاه ركب ليه بلاكا مزورة، أكثر من هذا السيد مول الموطور اتاهمو بلي خدا من عندو 3000 درهم باش يهجرو للخارج.

السيد متيقيش حيث قال انه متيعرفش هاد خينا، وقال ليهم جيبو لي هاد السيد نواجهوا، قالوا ليه مكاينش حقا ملقنياهش فدارهم. دابا البلوليس شدو واحد شفار عندو موطور مزور وواجهوه وقال ليهم حقا ما حقا البلاكا ركبها شخص سلفتو ليه وحقا عطيتو 3000 درهم باش يحركني، وطلقوه نعام أس، وزوينة هادي.

الى حدود اليوم هاد مول الموطور صاحب التصريحات مابانش ولابيجي مقدروش يلقاوه، كيفاش دار ليها الله وعلم!

رجل الأعمال قال للبوليس أنا نهار هاد السيد اللي متنعرفوش قال ليكم عطاني الموطور، كنت فكازا في الأوطيل فعين الذياب، ومطلعتش من كازا، وماعمرني ما مشيت لسلا أصلا، حيث ماعندي ماندير فيها.

بحال هاد الموقف النيابة العامة والشرطة خاصهم يديرو الانتدابات سوا لشركات الاتصال أو يمشيو للفندق يتأكدو او الى كانو كاميرات….المهم حتى وحدة مداروها.

دابا الفيلم باين بلي مول الدراجة النارية المزورة واللي معندهاش لاصورانص واللي طلقوه، هو اللي عارف الاسرار تاع هاد القضية حيث ماشي عطا للبوليس غير التصريحات بل عطاهم حتى رقم البطاقة التعريف الوطنية تاع السيد، ومن بعد غبر غبرة وحدة.

ومن بعد غا يقولو لرجل الاعمال حقا شي واحد جا من طنجة عندو القرقوبي شديناه جبد سميتك، وداوه ودارو ليه المواجهة معاه والسيد المشدود قال ليهم لا ما شي هادا هادا جامي واش شفتو. دابا اللي عطاو السمية لبائع القرقوبي، وعطاو رقم البطاقة لمول الموطور المزور، هما اللي باغين الخدمة فرجل الأعمال، وهادشي بان منين تشد في الحبس، وتحكم في الأول ب 6 أشهر، ومنين قرب يخرج قضيتو في الاستئناف، وعرفوه إلى خرج غايفضح، دارو شي أوديو تشهيري بالقضاة وهو يتحكم بثلاث سنوات، فهم تسطا.

دابا اللي دارو  هاد العملية باغين يدخلو حتى مراتو و ولدو للحبس. السؤال هو علاش ختارو مدينة سلا؟ وعلاش دارو أوديوات في تيكتوك تيشوشو على القضاة ويتهموهم باش ايغرقو رجل أعمال في الحبس؟

الهضرة دايرة فدبي بالإمارات والناس عرفوا بلي السيد قناو ليه قنية، ولكن الأدلة كلها معاه ومع ذلك دخل للحبس. خاص هاد القضية يتفتح فيها بحث، وكاع اللي مورط يتجبد…