كود – وكالات//

نوضات ناتاليا بيلولي، مرت الكوايري البرازيلي المعروف رافينيا نجم فرقة برشلونة، قربالة كبيرة فمواقع التواصل الاجتماعي.

ناتاليا حطات صورة فالحساب ديالها على “إنستغرام” كيبان فيها رافينيا وهو كيبوس ليها رجلها، وكتبات عليها تعليق كتعبر فيه باللي هاد اللقطة كتمثل بالنسبة ليها “الحب الحقيقي”.

هاد التصويرة دارت بوم فاليوتيوب والفيسبوك، وخلقات نقاش  ين المتابعين. بزاف ديال المغاربة علقو وقالو: “حميدة البواس”، ووحدين آخرين قالو  بلي هاد الرْجل هي لي كتماركي لبرشلونة.

فالمقابل، كاينين ناس لي دافعو على اللقطة واعتبروها تعبير على التواضع والحب الصافي لي بين الكوبل.

المهم هو أن رافينيا كيدوز من مرحلة زوينة فكاريير ديالو مع البارصا وللعلم هاد الكوبل رافينيا وناتاليا كيعرفو بعضياتهم ملي كانوا مراهقين فالبرازيل، وتزوجوا فـ 2022 من بعد قصة حب طويلة، وعندهم وليد سميتو غايل.