الرئيسية > تبركيك > ربورطاج. نص نهار ديال الشتا غرق كازا كاملة.. مواطنين عاودو لـ”كود” معاناتهم مع الفيضانات من بعد ما قلبوها عومان باش يوصلو لديورهم – تصاور
06/01/2021 11:00 تبركيك

ربورطاج. نص نهار ديال الشتا غرق كازا كاملة.. مواطنين عاودو لـ”كود” معاناتهم مع الفيضانات من بعد ما قلبوها عومان باش يوصلو لديورهم – تصاور

ربورطاج. نص نهار ديال الشتا غرق كازا كاملة.. مواطنين عاودو لـ”كود” معاناتهم مع الفيضانات من بعد ما قلبوها عومان باش يوصلو لديورهم – تصاور

عفراء علوي محمدي- كود//

لبارح فالعشية حتى لساعات متأخرة من الليل، ومازال للآن فمجموعة من الأحياء، بحال السباتة وعين الشق وليساسفة ودار بوعزة والحي الحسني، وعاد زيد كجموعة من الشوارع الدبيرة اللي حمل بيهم الواد وليتينيل والباركينكَات، كلها عمرات بالما بنص متر حتى لمتر ديال العلو، كاينين طوموبيلات كَاع غرقو كليا، وكاين اللي ماقدرش يرجع للدارو وبقا حاصل ساعات بسباب هذشي.

كلشي لبارح توثق بالصوت والصورة على مواقع التواصل الاجتماعي، مجموعة من المواطنين صورو هذ “الفضيحة الكبيرة” كيف سماوها، وبزاف منهم تشكى من هذشي، بعدما عمرو حوايجو وطوموبيلتو بالما.

غرقنا وماكانت حتى مساعدة من المسؤولين

ابراهيم، صحافي، تكلم مع “كود” على المعاناة ديالو لبارح مع الفيضانات، من بعد ما شد الكريق باش يمشي لتيط مليل، كيقول “لبارح دزت من عين الشق وتما حصلت مزيان، كَاع الطوموبيلات واقفين وانا كندوز فالضايات وخايف لا طوموبيلتي تسكت، كلشي واقف والماطر واقفين، حالة حالة !! بغيت نهرب من تما، ولا نحاول نخرج من كازا كَاع، لكن خفت فداك الظلام لا نحصل فشي بلاصة، وأنا ندير سباتة، وتماك عاد ما زدت حصلت مزيان.

وزاد براهيم كيحكي “تماك كاين الغاراق الغاراق ديال بصح، وماكاين حتى شي مسؤول أو شي واحد يقدر يعاونك، باستثناء الناس اللي كيتدخلو وكيحاولو يتعاونو فيما بيناتهم، وكيجيبو البنوات ويحبسو الطرقان باش مايخليوش الطوموبيلات  يكملو فيها باش مايغرقوش، وماكاين حتى تدخل نهائيا”.

وصرح ابراهيم أنه من 6 دالعشية حتى ل9 ونص دالليل عاد قدر يدخل للدار، و”حتى قربت نوصل حصراتني تاني  واحد الضاية كبيرة لقيت فيها جوج طوموبيلات واقفين والديباناجات كاينين جوج خدامين، منين وصلت للدار الضو مقطوع فدربنا كامل، وفقت دابا ولقيت ضو مازال مقطوع، لكن فالصباح عادي الضايات نقصو شوية”، على حد تعبيرو.

الطرام حابس واضطرينا نشدو طاكسي وحصلنا

نوال، مستخدمة فأحد الأبناك، حتى هي لبارح حصلات بالمزيان، مولفة تشد الكرام من شارع الحسن الثاني باش تمشي للحي المحمدي، وتبدل فمحطات المواصلة اللي كاينة، لكن صعاب عليها مع الفيضانات “لبارح مع جوايه ال7 علمونا فالمحطة ديال الطرام باش مانشدوهش، حيت ديجا وقع فيه مشكل من بعد ما دخليه الما، وصعاب على الطرامات يخدمو بوتيرتهم العادية، فاضطريت نشد طاكسي، لكن حتى الطاكسي لقيتو بصعوبة، وحتى هو حصل فالطريق”.

وزادت نوال: “عمرت كلي بالما، بقا غير راسي اللي مافزكش، كنت خايفة غير على البيسي اللي هازة معايا والتيليفون، وحتى مول الطاكسي بدا يقلب على بلاصة يابسة باش يحطني فيها باش منين نحل الباب مايدخلش لينا الما ومالقيناها غير بالكشايف.. الزحام اللي كان غريب وكتشوف الطوموبيلات ولاو باطوات كايعومو وسط الطريق.

الفيضانات نوضو حالة فمواقع التواصل الاجتماعي

بزاف ديال التشاور كارثية تبارطاجات على الفيضانات اللي عاشتها لبارح مدينة كازا، الطوموبيلات غارقين حتى لراسهم، وزوينة كاينة فالطرقات، والناس حاصلين، والما دخل للطرام، وللديور، والناس كتعاني.

التشطاء باركاجاو هذ التصاور فإطار الساركازم “المضحك المبكي”، كيف ساءلو من خلالها المسؤولينوقالو أن “نص نهار ديال الشتا ممكن يكشف بسهولة على سنين ديال الخدمة العوجة”، و”البنية التحتية المتهالكة فالعاصمة الاقتصادية للمملكة”.

وكاين فيهم اللي رجع كيطالب علال القادوس باش يرجع يعتق كازا من هذ الفيضانات، من بعد ما فقدو ثقتهم فالسلطات المسيرة للمدينة، ولاو يشوفو أن التضامن والتعاون الاجتماعي بين المواطينن ممكن يكون سبيل الخلاص.

موضوعات أخرى

27/01/2021 10:00

الجديد فقضية “حمزة مون بيبي”.. رفع العقوبة الحبسية فحق دنيا باطمة لعام ديال الحبس النافذ وها شحال عطاو لختها ابتسام والمصممة عياش وشاكيري

27/01/2021 09:20

واش كيتسناو هاذ المغتصب يجي على خاطرو من بلادو؟. مسلسل محاكمة البيدوفيل الكويتي قدام استئنافية مراكش باقي طويل.. المحكمة أجلات القضية للمرة 11