الرئيسية > آش واقع > ربورطاج من باريس. واخا اجباري: قليل اللي يسولك على الباس سانيتير وهاديك ديال لاكارط راها ما كايناش ولكن راهم فاتحين كلشي وتقدر تقصر حتى الصباح
21/10/2021 11:00 آش واقع

ربورطاج من باريس. واخا اجباري: قليل اللي يسولك على الباس سانيتير وهاديك ديال لاكارط راها ما كايناش ولكن راهم فاتحين كلشي وتقدر تقصر حتى الصباح

ربورطاج من باريس. واخا اجباري: قليل اللي يسولك على الباس سانيتير وهاديك ديال لاكارط راها ما كايناش ولكن راهم فاتحين كلشي وتقدر تقصر حتى الصباح

كود شيماء عبقاري باريس///

اليوم بدا فالمغرب العمل بالباسبور ڤاكسينال. الحكومة فرضاتو على اللي بغى يدخل للادارات وللمؤسسات الخاصة والعمومية وللمقاهي وللريسطورات. طبعا المغرب تبع دول دارت هاد التجربة.

المغرب كياخد امور كثيرة من فرانسا. هاد الدولة دارت هاد التجربة. لكن واش كلشي كيحتارم التجربة؟. هاد الشي تنقلو ليكم “كود” من خلال ثلاثة ايام عاشتها قبل الاثنين حتى البارح لاربعا.

اول ما يثير انو فاليومين الاولين تقريبا حتى حد ما كيطلبو، تعشيت مع صحاباتي وصحابي فمطعم ف”لوماري” وبالضبط زنقة “ڤيو طومبل”. ما طلبو حد. من بعد مشيت لبار ورا متحف بيكاسو٬ ماشي غير ما طلبوش الباس سانيتير، وحتى التباعد ما كاينش. كلشي ناشط ومقصر وبقات لقصارة حتى الوحدة ونص تقريبا وباش سد المحل٬ بقاو الزبناء وغالبيتهم اجانب. ما سول حد فهاد الباس سانيتير.

فالفطور كنت معروضة مع صديقة ف”بان او كوتيديان” حدا “شاتلي”. الواحد خاصو الصف فالصباح باش تلقى بلاصة. كتبقى تسنى شوية. حتى هادوك ما كيطلبو لا باس سانيتير لا غيرو. حتى الماسك كيلبسوه لكليان غير باش يدخلو ومن بعد كيحيدوه باش يبركو وباش يخرجو للزنقة حقاش ففرانسا ما بقاتش اجبارية الماسك.

اول واحد طلبو كان صباح اليوم الثاني فقهوة حدا متجر قريب من “ليزانڤاليد” ف16. حتى هاد القهوة ما كيطلبوه حتى تبرك تشرب قهوتك. يعني ماشي فالباب. عندهم الة صغيورة كتسكاني الكود ديال الباس سانيتير ديالك. كيديروها بشكل الي. ما كيشوفو والو. ما كيشوفوش اسمك، ما كيطلب منك حتى شي حد لا باسبور ولا غيرو. يعني ممكن جدا تهز باس سانيتير ديال شي حد اخر وتدخل بيه.

السكان فقط باش الى جا البوليس فشي فترة يعرف باللي عدد زبناء القهوة كينطابق مع عدد الناس اللي كاينين فهاديك الالة.

فالمتاجر ولا لاگار التران ولا حتى تدخل للمطار٬ حتى حد ما كيطلب منك الباسبور سانيتير. بل الاكثر كاع المتاجر اللي دخلت ليهم فهاد ليام الثلاث وزيد عليهم ليمول سواء فزنقة “ريڤولي” او غيرها فحي “سان جيرمان” ما كاينش اللي سول على هاد الباسبور.

كان لقاء مع فنان تشكيلي مغربي ف”سان جيرمان” وهنا ثلاثة لقهاوي دخلتهم و4 الگالريات٬ حتى حد ما طلب هاد الباسبور سانيتير.

طبعا حكاو لي اصدقاء باللي كلها وزهرو. ودرت تجربة. فاليوم الثاني مشيت لبيسترو تغديت ما طلبوش لي الباسبو سانيتير وفاليوم الموالي طلبوه. اللي تغير هو المسؤول. حتى هو قال باللي مرة يطلبو ومرة اللا وباللي بعض المرات البوليس كيجي عندهم.

فالطاكسيات ما كاينش اللي كيطلبو. بل كاين شي شوافرية الطاكسي حتى الماسك كيقولو ليك ايلى بغيتي تحيديه يا لالة حيديه.

طبعا غير لثلاث اللي فات كانت وقفة مرة اخرى حدا مقر البرلمان الفرنسي للاحتجاج على اللقاح وعلي هاد الباسبور سانيتير. الحكومة الفرنسية فارضاه ولكن الواقع حاجة اخرى. واقع مختالف علينا. ما عندهمش السدان مع لحداش او غيرها. لكمامة ما بقاتش اجبارية برا. التباعد ما محتارمو حد. شعب فارض اش بغى وقرارات بحال اجبارية الباس سانيتير٬ ما داير بيها حتى شي واحد.

دابا فالمغرب تطبيق هاد اجبارية الباسبور ڤاكسينال غادية تكون مختالفة على فرانسا. ايلى فرانسا قليل اللي كيطبقها، فالمغرب النسبة ديال اللي غاديين يطبقوها غادية تكون كبيرة.

موضوعات أخرى

06/12/2021 16:00

بنكيران يستنجد بالمثلية الجنسية! أراهن عليكم كثيرا أيها المثليون لأعيد لحزب العدالة والتنمية وهجه السابق

06/12/2021 15:30

بنعتيق لـ”كَود”: ها وقتاش غانبدا الحملة للترشح للكتابة الأولى ديال الإتحاد الاشتراكي.. وهاشنو أكد على لقاءه مع لشكَر