الرئيسية > آراء > ربورطاج. كيفاش لوطيلات ولات كتشبه لصبيطارات مع « كورونا فيروس » وناسها بحال لمقدمين حاضيين الماسك وتابعينك بجيل وزبناءها يشوفوك يبعدو منك
06/07/2020 12:00 آراء

ربورطاج. كيفاش لوطيلات ولات كتشبه لصبيطارات مع « كورونا فيروس » وناسها بحال لمقدمين حاضيين الماسك وتابعينك بجيل وزبناءها يشوفوك يبعدو منك

ربورطاج. كيفاش لوطيلات ولات كتشبه لصبيطارات مع « كورونا فيروس » وناسها بحال لمقدمين حاضيين الماسك وتابعينك بجيل وزبناءها يشوفوك يبعدو منك

كود اسماء غربي ////

السياحة مع كورونا فيروس ماشي غير مختالفة عليها قبل ما تبان هاد الجايحة بل غريبة بزاف. خديتي تران او مشيتي فطونوبيلتك او ركبتي فطيارة باش توصل للوجهة ديالك لهاد لوطيل او الاقامة السياحية غادي تكتاشف اولى علامات هاد الغرابة.

لوطيلات تحولو بحال شي صبيطارات. «كود » جمعات تجارب مواطنين دوزو شي ايام فلوطيلات داخل المغرب وخارجو.

سبق كتبات « كود » على السفر فالطيارة والخوف اللي كيركب فالمسافر. خوف كيقضي على متعة السفر. نفس الاحساس وبشكل مضاعف كيكون فلوطيل.

غير تدخل كتحس باللي راك غير مرحب بيه واخا خاسر فلوسك. حتى الباكاج ديالك ايلى كتني مثقل هزو بوحدك. شكون گال تكون جايب معاك شي فيروس لاصق فيها. كانو لوطيلات كيستقبلو الزبناء بالما بالحامض بشي عصير فهاد الصهد بمبردات. بكاس دتاي عندنا. هاد الشي ما بقاش. كيستقبلوك معوبسين. فخاطرهم كيقولو واش هاد بنادم مصطي جاي فهاد الوقت للوطيل. لابسين ماسكات. فالدخلة كاين جيل باش تمسح يديك. انت متهم بكونك حامل « كورونا فيروس » خاصك تعقم يديك. دير الماسك. هادي ضرورية.

فمدن اللي الحرارة فيهم كتفوت 34 درجة كلشي كيعاني فلوطيل. زبنا وعمال وموظفين وسيرفورات…

فليام العادية كيكون واحد الجو زوين فالعطلة. شي يسلم على شي. زبناء وخدامة. دابا والو تقريبا. بل شي كيهرب من شي. فلاسنسور ايلى كانو كيتسناوه جوج ما كيتعارفوش. كتلقى كل واحد بعيد على لاخر بكثر من 3 مترو. وباش كيوصل ما كيمشيش معاه. كيخليه يطلع بوحدو وكيتسنى واحد يجي خاوي. ما كاينة ثقة

كتولي تحس براسك غير مرغوب فيه لا من طرف الزبنا بحالك ولا من طرف اللي كيدور حداك من المستخدمين.

فلوطيل فين ما دور تلقى عبارات مع رسوم علي التباعد علي التعقيم على الماسك.
الفضاء الوحيد اللي كتكون فيه حر فلوطيل واللي مازال ما كتحكمش فيه الادارة هي غرفتك. تفوتها حريتك تقلصات.

تنزل فالصباح تبغي تفطر. خاصك ضروري تكون داير الماسك. فالحقيقة هادا ما عندو معنى. حقاش هادو اللي كتلاقاهم فحالة الي كان فيك الفيروس راه ممكن تعاديهم.

اللي زغبو الله ونسى الماسك خاصو يرجع يجيبو والله لا عتبها بلا ماسك وبلا ما يغسل يديه بجيل اللي فيه لالكول.

تفطر وتبغي تمشمش ولا تعوم فالبيسين. خاصك قبل ما توصل لهاد البيسين تكون داير الماسك. باقي ليهم غير يفرضوه فالبيسين. هادي يقدرو يديروها.

تبغي تمشي للبحر خاصك ماسك حتى توصل. دور فالمدينة خاصك ماسك. كتخنق. كتكعى.

المستخدمين اللي فلوطيل كيوليو بحال لمقدمين. ايلى زغبك الله وحيدتيك وشافك شي حد منو كيبدى يقول ليك « موسيوه دير الماسك ». غير هاد العبارة تقلقك باش كتعاود كل مرة.

كيفما كان لوطيل. كيفما كان المستخدمين كيفما كانت لمدينة فاسبانيا كيدوز يامات لوطيل فخوف. بعض المرات كيوصل للرعب. كتولي خايف من جنابك.

عنداك دوخ وتقول راه لوطيلات ناقصين ب70 بالمائة نمشي نبروفيتي من هاد لوجيبة. عنداك تقولب. راك غادي تفقص كثر. ما غاديش تمتع. من الاحسن اللي ما عندوش سبب قاهر يسافر يشد لرض. يبقى فدارو حسن ليه. اللي ولا بد يمشي لشي دار. يبعد من لوطيلات. كاع اللي كان مثير فيهم قبل كورونا مشى. شوية بشوية كيوليو قرب من صبيطار لاوطيل.

موضوعات أخرى