گود سبور //

كيفاش عندنا فالبطولة الاحترافية لكرة القدم، نماذج رؤساء بحال هاشم آيت منا ونصر الدين گرطيط شادين فرق كبيرة، وبغينا هاد الأندية والبطولة الاحترافية تمشي بالسرعة اللي غادي بها TGV فوزي لقجع رئيس الجامعة الملكية المغربية لكرة القدم والمنتخبات الوطنية.

راه صعيب تقلع البطولة الاحترافية والفرق المغربية وتزيد للقدام، ومازالين فيها نماذج ديال رؤساء تقليديين بحال هشام آيت منا ونصر الدين گرطيط اللي كايحاولو يروجو لريوسهم على أنهم رؤساء ديال البرامج والشركات الرياضية، وأنهم عندهم الحال مازال لإخراج الوداد واتحاد طنجة من الأزمة، وهما فالحقيقة نماذج متخلفة فالتسيير الرياضي، وطريقة إدارتهم وتدبيرهم لأنديتهم أكل عليه الدهر وشرب.

هشام آيت منا ونصر الدين گرطيط و14 رئيس نادي بحالهم بنفس العقلية حطو أنديتهم المنتمية ما بين القسم الأول والثاني فالبطولة، فواحد الموقف مكفس ووضع صعيب، حيث يقدرو يبقاو بلا انتدابات فهاد الميركاتو الصيفي، وهما اللي معولين جماهيرهم على الميركاتو الصيفي باش يقويو فرقهم استعدادا للموسم الرياضي الجاي.

كيفاش دابا هشام آيت منا ونصر الدين گرطيط يستاهلو يكونو رؤساء أندية كبيرة وعريقة بحال الوداد الرياضي واتحاد طنجة، وهما أبسط الأمور ما داروهاش باش يخليو الناديين ديالهم فوضع قانوني، وما استاجبوش للمراسلات المتكررة ديال العصبة الوطنية لكرة القدم الاحترافية حول الوضعية المالية للناديين وهاذ الشي من تاريخ 16 ماي 2025، ولكن بلا حتى شي رد وهذا الأمر أكداتو العصبة الاحترافية برئاسة عبد السلام بلقشور، وراه ماشي غير الوداد واتحاد طنجة اللي عندهم هذا المشكل، ولكن 14 نادي آخر معهم، والمجموع هو 16 نادي من القسم الأول والثاني حتى هما عندهم رؤساء ومسؤولين ما مسوقينش بحال آيت منا وگرطيط، وطبعا هاد الأندية راه غاتكون ضحية الرؤساء والمسؤولين ديالهم إلى تمنعت من تأهيل اللاعبين الجداد اللي سناو معهم فهاد الميركاتو، خصوصا وأن التخلف عن الرد على مراسلات العصبة الاحترافية ولمدة اكثر من شهر ونص ما عندو حتى شي مبرر واخا يكون رئيس النادي مشغول بالمشاركة فمونديال الأندية، حيث الرجاء الرياضي اللي مدة هادي وهما كايوجدو لجمع عام عادي وغير عادي لانتخاب رئيس جديد وهاد الانشغلات اللي عندهم ديال الانتخابات والشركة الرياضية، وما تخلفوش على الرد على العصبة والملف ديالهم راه كاتدرس فيه بحالهم بحال الأندية اللي كشفت على الوضعية المالية ديالها.

هاد النماذج السيئة فالتسيير والمسيئة للأندية المغربية بحال آيت منا وگرطيط، كاتزيد تبين فارق المسافة بين الجامعة الملكية المغربية لكرة وكيفاش كاتسير بطريقة عقلانية ديال 2025 وفين مأفونسيا، والأندية الوطنية فين مازال كاتعرج وكاتحاول تشعبط وتبقى على قيد الحياة مع رؤساء كايطيرو فالرواج والتصاور، وهما فالحقيقة مازال غارقين فعقلية مول الشكارا والترقيع من هنا ومن الهيه، وإلى كانو المسؤولين على الكورة المغربية باغيين نيت إقلاع حقيقي بالأندية راه أول وحدين خاصهم يباليو بهم هما بحال هاد رؤساء الأندية اللي ما فيديهمش ويتحاسبو ويمشيو بحالهوم من الكورة، حيث المغرب راه مقبل على احتضان تظاهرات عالمية بحال كأس إفريقيا 2025 ومونديال 2030، وخاصو أندية كرة قدم للي تواكب وتزكي الخدمة ديال الجامعة الملكية المغربية لكرة القدم ومجهوداتها برئاسة فوزي لقجع لتطوير هذا المجال، باش يكون واجهة واستثمار مساهم فتطور المغرب، وهذا الشي خاصو رؤساء أندية ومسيرين عندهم نفس العقلية المتطورة ديال فوزي لقجع اللي مواكب تطور الكرة العالمية والدليل هو المنتخبات الوطنية بتنوعها وفئاتها السنية فين وصلت وتطورت إفريقيا وعالميا، ماشي رؤساء بحال آيت منا وگرطيط اللي مازال عايشين على التسيير الارتجالي وهذا الشي علاش الجامعة والمنتخبات غاديين بالـTGV والأندية مازال كاتعرج.