محمد سقراط – كود//

على ما يبدو إقليم الحوز والمنطقة لي ضربها الزلزال قريبة تحول لزبالة كبيرة بفضل المساعدات العشوائية لي وصلات للمنطقة، حقا المغاربة بينو على روح تضامن عالية وتحركات المساعدات من المغرب كامل، وهادي ماشي أول مرة يديروها المغاربة راه دارو نفس القضية في زلزال أكادير حسب مكيعاودو وعاود ميلونشون وداروها في زلزال الحسيمة وهادشي أغلبنا عاشوا وشافوا وحضر ليه، وقبل ماتكون المساعدات من أجل الادسنس والتصاور وتطلع الكونط ديال إنستا، في زلزال الحسيمة تحركوا الناس من المغرب كامل وسيفطو كاميوات ديال السلعة والهدف يعتقوا خوتهم روافة وهادشي معروف على المغاربة.

هاد المرة تقديم المساعدة تحول لنزهة مدفوعة الأجر من مواقع التواصل، الناس غادين مساريين ودايرين الروينة والخدمة للمخزن، كاين دراري مشاو بماتريال واعر بحال منير وعلي وخلقو الفرق ودارو حل للموشكيل، كاين صحاب الدراجات الترايل لي قدرو يوصلو الأدوية والحاجات لخفيفة لمناطق نائية، كاين أطقم طبية مجهزة، وكاين الخوى الخاوي والزحام، وتصوير الفيديوات وإذلال الساكنة، بنادم ضارب الطريق باش يفرق صندالة دميكة ويطرو حليب ويصور الناس ويستغلهم ويذلهم، راه كون دوزو هاديك اليوماين او كثر بجوع على ماتوصل مساعدات المخزن ومكانش توقع ليهم هاد الحالة ديال الاستغلال البشع.

من بين أكثر الحاجات لي كانو كيميزو منطقة الحوز هو نظافتها ونظافة ماليها، لكن للأسف ومن بعد الزلزال كاين تركز ديال الزبل من مخلفات المساعدات ومن المساعدات نيت لي، البعض منها كان عبارة على زبل عوض يلوحوه ماليه سيفطوه للحوز على شكل مساعدات، شي شراوط وشي زبل دالحوايج ودالمواد ماصالحة لوالو تم تكديسها جنب الحيوط الرايبة وسماوها مساعدة، وفي البادية المعزولة راه صعيب تتخلص منها وغي الغالب غادي توصل لبطون الحيوانات لي تما وتقد تقتل البعض منها، ومع ذلك، وحدين في واحد الفيديو مقلقين من سكان المنطقة لي لاحوا المساعدات شي صيكان ديال الحوايج لاحوهم جيهة الواد عالله تجي شي رعدة وتهبطهم لمراكش لواد ايسيل، وكالسين كيتخننو وا حشومة هادشي حنا ضاربين عليه تمارة والطريق مكنتوش تلوحوه، وراه في الواقع حشومة على لي جامع الزبل وضارب بيه الطريق ومسميه مساعدات لي عوض تساعد غادي تخلق مشكل بيئي وترجع أجمل مناطق المغرب العذراء لزبالة كبيرة.