سهام البارودي كود//

راه كلشي كايبدا من النظرة الدونية لي عند بزاف ديال الرجال المغاربة للمراة، خاصنا نرجعو للأصل لابغينا نفهمو هاد الحيحة لي نايضة على المدونة، علاش بزاف ديال الرجال رافضينها ونايضين كايكشكشو فوسائل التواصل الاجتماعي؟

الأصل هوا أنه الرجل أساسا كايشوف المراة كيف شي عبدة ديالو، شي إنسانة خاصها تكون ديما خاضعة ليه وتحت منو، جدّاه كانت تحت من جدّو ومّو تحت من بّاه وهوا أصلا كبر وهوا كايسمع بلي هوا راااااااااااجل، ألف وحدة تمناه، مّو كاتقوليه ولدي راجل وخالتو كاتقوليه ولد ختي راجل، والمجتمع والدّين والقانون كلشي فصفو وكلشي واقف معاه وكلشي كايقوليه نتا هوا السّبع!

فاللخر تجي “المراة” “المريوة” لي حتى لهادي واحد الخمسين عام كانو كايقولو ليها “المراة حاشاك” وتبغي تفارق معاه، من بعد ما هوا، مولاي السلطان قبل أنه يخطبها ويتجوج بيها ويعطيها داك السطاتي ديال “مرت الراجل” فاللخر شنو؟ فاللخر تفارق معاه! وماشي غير تفارق معاه بل ويعطيها النفقة وجزء من الممتلكات! راه بالنسبة ليه الحماق هذا! خرجان العقل! فحال شي واحد مربي كلب وواحد النهار قالو ليه صباح الخير راه خرج واحد القانون كايعطي الحق للكلب ديالك ياخد النص فالدّار! أصلا مسألة أنه المراة طلَقو راه بالنسبة ليه شرخ نرجسي، جرح كبير، وايلي كيفاش هاد المراة باغا تسمح فيا أنا؟ السبع؟ الراجل! ياك مّي كانت كاتقوليا ألف وحدة تمنّاني؟ و من فوق هادشي نعطيها النفقة وتاخد جزء من الممتلكات! الحماق هذا !

لا هوا باغي المراة لا قررات الطلاق ولا لابغا هوا يطلقها أنها تخرج خاسرة من جميع النواحي، مايعطيها والو، خاصها تتعذب وخاصو ينتاقم منها هي وولادها! اه! شكون بغات تكون هاد المراة هادي؟ تحل ليها الفم! ضسرات …

راه هادي هي الأفكار لي معششَة فالريوس د گاع هادو لي كايحيحو على التعديلات د المدونة، كلها جايّة من فكرة وحدة “أنه المراة عبدة د الراجل مشرطة الحناك” ماعمرها تگاد معاه وماعمرها تكون فحالو، داكشي علاش فحال أي عبدة نهار يقرر مول شَي يطلقها خاصها تخرج عريانة وحفيانة.

فالدول المتقدمة الراجل أصلا كايتربى على أساس أنه فحالو فحال المراة، سواسية قدام العائلة والمجتمع والقانون، وأنها ماشي “ديالو” خاصها تعيش تحت “السلطة” ديالو، داكشي علاش نهار كايكتاب الفراق كاتلقى كل طرف عارف ما له وما عليه، هوا أصلا كايعتابر أن المراة ساهمات معاه فالثروة ومن حقها تاخد جزء منها، كايجلسو فوق الطبلة وكايشوفو الحوايج المشتركة بيناتهم وكايصفيوها (كريديات، ممتلكات…) وفاش كايوصلو للدراري كايتحملو مسؤوليتهم بالمساواة، الراجل كايڤيرصي لابونسيون اليمونتيغ لولادو وكايتقاسم التربية ديالهم مع مهم! كايشوفهم وكايشوفوه وكايعطيهم من وقتو وفلوسو ومجهودو حيت ولادو هادوك.

ماشي فحال بعرور كايطلق المراة ويطلق معاها الأولاد ولا عيطو ليه يخلص النفقة كايفضل يدخل للحبس! وجه الحبس!